Քրիստոնեա-դեմոկրատական միության ղեկավար եւ Գերմանիայի պաշտպանության նախարար Աննեգրետ Կրամպ-Կառենբաուերը որոշել է չառաջադրվել երկրի կանցլերի պաշտոնին: Նա կթողնի նաեւ կուսակցության առաջնորդի պաշտոնը: Այս մասին հայտնել է Welt-ը:
Իր որոշման մասին Կրամպ-Կառենբաուերը հայտնել է փետրվարի 10-ին՝ կուսակցության համագումարի ժամանակ: Նա հայտարարել է, որ Գերմանիայում «անհասկանալի հարաբերություններ են առաջացել Քրիստոնեա-դեմոկրատական կուսակցության, «Այլընտրանք Գերմանիայի համար» ծայրահեղ աջ կուսակցության եւ ձախերի միջեւ»: Կրամպ-Կառենբաուերը կտրականապես դեմ է այս կուսակցությունների հետ համագործակցելուն, նշում է Welt-ը:
Ինչպես գրում է Associated Press-ը, Կրամպ-Կառենբաուերի որոշումը կապված է Տյուրինգիայում տեղի ունեցած ընտրությունների հետ: Ընտրությունների 3-րդ տուրում այս կուսակցություններն անսպասելիորեն պաշտպանել են Ազատ դեմոկրատական կուսակցության թեկնածուին՝ Կեմերիխին, ինչի արդյունքում նա հաղթել է ստանալով 46 ձայն:
Դրանից հետո Անգելա Մերկելը տեղի ունեցածն անվանել է «խայտառակություն ժողովրդավարության համար» եւ Կեմերիխին կոչ է արել հրաժարական տալ:
Կեմերիխը ընտրություններում հաղթելուց 3 օր հետո հրաժարական ներկայացրեց: