Ղազախստանում Ժամբիլսկի շրջանի Կորդայսկի բնակավայրում 8 մարդ է զոհվել բախումների և զանգվածային ծեծկռտուքի արդյունքում, հաղորդում է ՌԻԱ «Նովոստին»՝ հղում անելով ՆԳՆ տվյալներին։
Բախումների ընթացքում մի քանի տասնյակ մարդ է տուժել։
47 հոգի ձերբակալվել է։
Ինչպես հաղորդել է Ղազախստանի ՆԳ նախարար Երլան Տուրգումբաևը, բերման ենթարկվածները ոստիկանությունում են, նրանց մոտից երկու որսորդական զենք է առգրավվել։
Ավելի վաղ երկրի ՆԳ նախարար Եռլան Տուրգումբաևը հայտնել էր, որ Մասանչի գյուղի մոտակայքում մոտ 70 ագրեսիվ տրամադրված բնակիչներ են հավաքվել, որոնց միջև ծեծկռտուք է սկսվել:
Նրա խոսքով՝ սադրիչներն այդ ամենը նկարահանել են և սոցցանցերի միջոցով քաղաքացիներին հակաօրինական գործողությունների կոչեր արել:
Ղազախստանի նախագահ Քասըմ – Ժոմարտ Տոկաևը նույնպես հայտարարություն է տարածել՝ կապված Ժամբիլսկի շրջանում տեղի ունեցած իրադարձությունների հետ։ Նա ցավակցել է զոհված քաղաքացիների հարազատներին ու մտերիմներին և շուտափույտ առողջություն մաղթել վիրավորներին։
Այժմ իրավիճակը վերահսկվում է ոստիկանության և Ազգային գվարդիայի կողմից: Տոկաևը իրավապահներին հանձնարարել է միջոցներ ձեռնարկել միջադեպի հետևանքները վերացնելու համար: