Ստամբուլում վթարային վայրէջքի ժամանակ թռիչքուղուց դուրս եկած ինքնաթիռի ուղևորը պատմել է թռիչքի ընթացքում տարօրինակությունների մասին, հաղորդում է BBC-ն:
«Ինչ-որ տարօրինակ բան էր կատարվում հենց սկզբից: Թռիչքի ընթացքում ինքնաթիռն անընդհատ թափ էր տալիս»,- ասել է Ալպեր Կուլուն: Բացի այդ, նրա խոսքերով, ինքնաթիռի վայրէջքի արագությունը սովորականից մեծ է եղել, և վայրէջքի ընթացքում հայտարարություն է հնչել. «Կարող եք միացնել ձեր բջջային հեռախոսները, բարի գալուստ Ստամբուլ»:
Դրանից անմիջապես հետո, նշել է տուժողը, ինքնաթիռը մի քանի անգամ ճոճվել է աջ և ձախ: «Հետո այն վեր թռավ և ընկավ մոտ 40 մետր, ասես բլրից, այնուհետև մասերի բաժանվեց»,- պատմել է նա՝ նշելով, որ այդ ժամանակ վառելիքի լուրջ արտահոսք է տեղի ունեցել, և դեպքի վայր ժամանած փրկարարները հայտարարել են պայթյունի վտանգի մասին:
Փետրվարի 5-ին Pegasus Airlines ավիաընկերության ինքնաթիռը վթարային վայրէջք է կատարել Սաբիհի Գեկչենի անվան օդանավակայանում: Իզմիր քաղաքից ժամանած ինքնաթիռը վայրէջքի ընթացքում դուրս էր եկել թռիչքուղուց, բախվել արգելապատնեշին և վթարի ենթարկվել:
Միջադեպի արդյունքում, վերջին տվյալների համաձայն, զոհվել է երեք մարդ, 179-ը հոսպիտալացվել են: Պատահարի պատճառ է անվանվել եղանակային վատ պայմանները:
