Ըմբշամարտի Հայաստանի հավաքականը նոր լեգեոներ ունի։ Օլիմպիական խաղերի չեմպիոն, ըմբիշ Հաջիմուրադ Գացալովը նպատակ ունի Տոկիոյում մեդալ նվաճել Հայաստանի համար: «Շատ ուրախ եմ, որ միացել է Հայաստանի թիմին: Հարցեր կային իմ տարիքի հետ կապված, սակայն կուզենայի ասել, որ ես ինձ մարզավիճակում եմ պահել և տրամադրված եմ լուրջ արդյունքներ գրանցել: Փորձելու եմ ինձ վրա դրված հույսերն արդարացնել: Իմ հերթին ամեն ինչ անելու եմ Օլիմպիական խաղերում մեդալ նվաճելու համար»,- լրագրողների հետ հանդիպմանն ասաց Գացալովը:Վերջինիս խոսքով` ինքը նպատակ ունի այս տարի Հայաստանը ներկայացնել Տոկիոյի Օլիմպիական խաղերում: «Երիտասարդ թիմ ունեք և վստահ եմ, որ միասին կհաջողենք առաջիկա մրցաշարերում»,-ասաց նա:Ազատ ոճային ըմբիշ Հաջիմուրադ Գացալովը Աթենքի Օլիմպիական չեմպիոն, աշխարհի հնգակի և Եվրոպայի եռակի չեմպիոն է: Հանդես է գալիս 97 կգ քաշում:
Վերջին մրցաշարը, որին մասնակցել է, եղել է 2016 թվականի Ռուսաստանի առաջնությունը: Գացալովի Հայաստանի հավաքականում հայտնվելը մեծ ոգևորությամբ է ներկայացվում հասարակությանը։ Նշվում է, որ մեր թիմն ունի փորձառու ըմբիշ, ում ներկայությունը կարող է դրական ազդեցություն ունենալ երիտասարդների վրա։ Այո, փորձառու մարզիկների առկայությունը օգտակար գործոն է, բայց․․․։ Սկսենք նրանից թե ինչու և ինչպես է Գացալովը հայտնվել Հայաստանի հավաքականում։ 2016 թվականին Ռուսաստանի առաջնության եզրափակչում Գացալովը պարտվել էր Անզոր Բոլտուկաևին և չէր ընդգրկել Ռիոյում կայացած Օլիմպիական խաղերի մասնակիցների կազմում։ Դրանից հետո Գացալովը հրաժեշտ էր տվել սպորտին։ 2020 թվականին Տոկիոյում կայանալիք Օլիմպիական խաղերին ընդառաջ Գացալովը որոշել է վերադառնալ մեծ գորգ և կարիերան ավարտել դրական նոտայի ներքո։ Ռուսաստանի հավաքականում մրցակցությունը մեծ է և այս երկրի ազգային թիմում ընդգրկվելը Գացալովի համար ուղղակի անիրատեսական է։ Իր նպատակն իրականացնելու համար Գացալովը որոշել է օգտագործել Հայաստանը, մեր երկրի դրոշը։ Դե բնական է, ինչպես կարող էր մեր մարզական գերատեսչությունը մերժել ազգությամբ օս եղբայրական Ռուսաստանը ներկայացնող հայտնի մարզիկին։ «Ես Ռուսաստանի «պատրիոտն» եմ և շարունակում եմ հանդիսանալ իմ երկրի քաղաքացի։
Ըմբշամարտում գոյություն ունի սպորտային քաղաքականություն և ես ընտրել եմ Հայաստանի քաղաքացիությունը, մեծ գորգում բարձր արդյունքներ գրանցելու համար»,- ՏԱՍՍ գործակալությանը տված հարցազրույցում ասել է Գացալովը։ Վերջինս մեր հավաքականի կազմում մասնակցելու է օլիմպիական խաղերի վարկանիշային մրցաշարերի։ Իսկ ի՞նչ կտա մեր հավաքականին, մեր երկրին Գացալովի մասնակցությունն օլիմպիադային։ Եթե նույնիսկ Գացալովը նվաճի ոսկի, պետք է ցնծա՞նք ասենք, որ օլիմպիական չեմպիո՞ն ունենք։ Այո, մեր երկրի հաշվին կգրանցվի ոսկի, բայց ի՞նչ արժեք կունենա այդ ոսկին։ Ըմբշամարտի Հայաստանի հավաքականի կազմում բազմիցս մեդալներ են նվաճել ռուս և կովկասյան երկրներից դժվար արտաբերվող ազգանուններ ունեցող այլ մարզիկներ, և․․․։
Ով է հիշում նրանց, կամ ինչ դրական ազդեցություն են թողել նրանք հայկական սպորտում։ Պատասխանը թողնում ենք ընթերցողի հայեցողությանը։ Ռուսատանի հավաքականից դուրս մնացած ըմբիշները օգտագործելով Հայաստանի դրոշը իրենց հաշվին մեդալներ են գրանցել։ Մենք շարունակ հեգնում ենք ադրբեջանցիներին, որոնք օտարերկրացի մարզիկների հաշվին մեդալներ են նվաճում, բայց կարծես շարժվում ենք նրանց անհեռանկար քաղաքականությամբ։
Ավելին, եթե Ադրբեջանը միլիոնավոր դոլարներ է ծախսում բարձրակարգ մարզիկներ ձեռք բերելու համար, մենք մեր հավաքականում ընդգրկում ենք Ռուսաստանի հավաքականից դուրս մնացած չեմպիոն թոշակառուների։
