Պաշտպանության նախարարությունը Զինված ուժերի կազմում նոր ստորաբաժանում է ստեղծում։ Այսօր պաշտպանության նախարարության, «Հայաստանի գիտության և տեխնոլոգիաների հիմնադրամ»-ի և «Հայ Տեք» կիբերանվտանգության կենտրոն հիմնադրամի միջև ստորագրվել է փոխըմբռնման հուշագիր, որով ազդարարվել է 19-91 ստորաբաժանման ստեղծումը:
Կիբերանվտանգություն, մեքենաշինություն, ռոբոտաշինություն, արհեստական բանականություն. սրանք այն ոլորտներն են, որոնցում ապագա զինծառայողները հնարավորություն կունենան մասնագիտանալու նոր՝ 19-91 ստորաբաժանման կազմում։
Թեմայի շուրջ «Առաջին լրատվական»-ի հետ զրույցում «Հայաստանի գիտության և տեխնոլոգիաների հիմնադրամ»-ի տնօրեն Արմեն Օրուջյանը նշեց. «Բոլոր այն երկրները, որոնք ունեն հզոր բանակներ, ունեն այնպիսի վաշտեր, որոնք աշխատում են ամենակատարյալ տեխնոլոգիաների վրա: Երիտասարդ զինծառայողները, որոնք այս ստորաբաժանման կազմում ընդգրկվելով՝ երկու տարվա ընթացքում գիտելիքներ են ձեռք բերելու և նաև աշխատանք են ցույց տալու, կլինեն շատ ծանրաբեռնված, քանի որ, ինչպես գիտեք, ուղեղի աշխատանքը ավելի շատ էներգիա է ծախսում: Այս զինծառայողների վրա մեծ պատասխանատվություն է դրվելու՝ ազգին, պետությանն օգտակար լինել:
Այս ստորաբաժանման կազմում ընդգրկվելու համար մեծ գիտելիքներ են անհրաժեշտ, ցանկացած զորակոչիկ կարող է քննություն հանձնել, քննությամբ ընտրված երիտասարդները վեց ամիս դասընթացների կմասնակցեն, ապա նորից քննություն կհանձնեն՝ 19-91 ստորաբաժանման կազմում ընդգրկվելու համար: Ուզում ենք հարթակ ստեղծել, որպեսզի մարզերում բնակվող երիտասարդները նույնպես կարողանան մասնակցել դասընթացներին»:
Մանրամասն՝ տեսանյութում: