Փետրվարի 6-ին ՀՀ պաշտպանության նախարար Դավիթ Տոնոյանն ընդունել է հունվարի 30-ին ՊԲ N զորամասում մահացած ժամկետային զինծառայող Վահրամ Ավագյանի ընտանիքի անդամներին։ Հանդիպմանը մասնավորապես մասնակցել են Վահրամ Ավագյանի հայրը և եղբայրը։ Պաշտպանության նախարարը մահացածի հարազատներին ևս մեկ անգամ իր ցավակցությունն է հայտնել և վերահաստատել, որ իր իրավասությունների շրջանակներում հետևողական է լինելու դեպքի բոլոր մանրամասների բացահայտման հարցում։ Դավիթ Տոնոյանը Վահրամ Ավագյանի հարազատներին տեղեկացրել է Պաշտպանության բանակում ձեռնարկված կարգապահական միջոցների, այդ թվում՝ մի շարք պաշտոնատար անձանց զբաղեցրած պաշտոններից ազատումների մասին։ Պաշտպանական գերատեսչության ղեկավարը նաև ընդգծել է, որ ՊՆ-ն իր լիազորությունների շրջանակներում աջակցելու է նախաքննության օբյեկտիվ իրականացման գործընթացին։
«Առաջին լրատվական»-ի հետ զրույցում մահացած զինծառայողի համագյուղացիներն ու ծանոթները նշեցին, որ ճանաչելով Վահրամին՝ նրանից երբևէ վատ արարք չեն տեսել, հակառակը՝ մշտապես եղել է զուսպ և հավասարակշիռ երիտասարդ։ Նրանց խոսքերով՝ պաշտպանության նախարարը խոստացել է, որ մեղավորը կամ մեղավորներն օրենքի ողջ խստությամբ պատասխանատվության են ենթարկվելու և նրանք վստահում են այս կառավարությանն ու նախարար Դավիթ Տոնոյանին։
«Վերջինս անկեղծ ցանկություն և կամք է արտահայտել օրենքի շրջանակներում ընտանիքի անդամներին աջակցելու հարցում, իսկ մնացածն արդեն ցույց կտա նախաքննությունն ու իրավապահ մարմինների աշխատանքը»,-ասում են նրանք՝ հույս հայտնելով նաև, որ նախարարի խոստումը չի մնա լոկ որպես խոսքեր, այլ Պաշտպանության նախարարությունն, իսկապես, հետամուտ կլինի Վահրամ Ավագյանի գործի օբյեկտիվ և բազմակողմանի քննությանն ու բացահայտմանը։
«Պետք է հուսանք, որ արդարությունը կվերականգնվի և այս ողբերգության մեղավորներն իրենց արժանի ու համապատասխան պատիժը կկրեն, ընդ որում՝ գործին առնչություն ունեցող թե´ ուղղակի, թե´ անուղղակի մեղավորները, այսինքն՝ պատասխանատվության կենթարկվեն ոչ միայն այն մարդիկ, ովքեր սպանել են Վահրամին, այլ նաև այն նրանք, ում պատասխանատվության տակ է եղել իրավիճակն ու դեպքը և այս ամենը կգտնի իր տրամաբանական լուծումը։ ՊՆ-ից մեր ակնկալիքը սա է, իսկ մնացածն արդեն ցույց կտա ժամանակն ու առաջիկա զարգացումները և մենք էլ մեր հերթին շատ ուշադիր և հետևողական ենք լինելու իրավապահների աշխատանքին ու գործի բացահայտմանը»։
Նշենք նաև, որ Արցախի Պաշտպանության բանակի զորամասում հունվարի 30-ին ժամկետային զինծառայող Վահրամ Ավագյանի մահվան դեպքի հանգամանքները պարզելու համար բանակի հրամանատարի հրամանով ստեղծված հանձնաժողովի կողմից անցկացվել է ծառայողական քննություն։ Քննության արդյունքներով որոշում է կայացվել մի շարք ավագ սպաների, այդ թվում՝ զորամասի հրամանատարի բարոյահոգեբանական ապահովման գծով տեղակալին և դիվիզիոնի հրամանատարին զորացրել Զինված ուժերի շարքերից։
Արցախի պաշտպանության նախարարության մամուլի ծառայության հաղորդագրության համաձայն՝ նույն գործի շրջանակում խիստ կարգապահական տույժերի են ենթարկվել զորամասի հրամանատարն ու նրա տեղակալները, իսկ որոշ պաշտոնատար անձանց նկատմամբ կիրառվել է պաշտոնի իջեցում։
Հիշեցնենք՝ զինվորի մահվան կապակցությամբ ինքնասպանության հասցնելու հատկանիշներով հարուցված քրեական գործի շրջանակում մեղադրանք է առաջադրվել նրա երեք ծառայակիցներին, այդ թվում՝ ՀՀԿ անդամ, նախկին պատգամավոր Առաքել Մովսիսյանի (Շմայսի) որդուն՝ Դավիթ Մովսիսյանին։ 3-ն էլ կալանավորված են։
