30-ից ավելի շանհայական ռոբոտ-ախտահանիչներ են սկսել աշխատել Չինաստանի Ուհան քաղաքի՝ կորոնավիրուսի տարածման էպիկենտրոնի հիվանդանոցներում: Դրանք, ինչպես հաղորդել է «Սինհուա» գործակալությունը, բժիշկներին օգնում են պայքարելու վարակի դեմ՝ տեղեկացնում է RIA Novosti-ն։
Նշվում է, որ ռոբոտները մշակել և արտադրել է Շանհայի TMiRob ընկերությունը: Կազմակերպության գլխավոր տնօրենը զանգվածային լրատվամիջոցներին հայտնել է, որ ռոբոտները սպիտակ գույնի են, դրանց «գլուխները» հանդերձված են ջրածնի պերօքսիդի փոշեցիրով, իսկ «փորի մեջ» ներդրված են ինը ուլտրամանուշակագույն լամպեր: Խելացի ռոբոտները կարող են կատարել տարբեր տեսակի վարակազերծումներ: Դրանք նաև հանդերձված են տարածությունում կողմնորոշման հատուկ տեխնոլոգիայով, որը դրանց թույլ է տալիս խուսափել արգելքներին բախվելուց:
Ռոբոտները վարակազերծման առաջադրանքներ են կատարում մեկուսարան-հիվանդասենյակներում, ինտենսիվ թերապիայի բաժանմունքներում, վիրահատարաններում և Ուհան քաղաքի խոշոր հիվանդանոցների ամբուլատոր բաժանմունքներում: Դրանք օգնում են նվազեցնելու հիվանդների խաչաձև վարակման ռիսկերը և մասնագետների աշխատանքն ավելի արդյունավետ են դարձնում։
