«Միտումնավոր, ծրագրված կերպով, պետական մակարդակով ինձ թալանեցին, սնանկացրին, իսկ իրենք հիմա առոք-փառոք ազատության մեջ են։ Աշոտը բանտից դուրս է եկել, Տիգրան Սարգսյանը բարձր պաշտոն է զբաղեցնում, դե Կճոյանն էլ բոլորը գիտեն։ Այս ամբողջ պատմությունից միակ տուժողը ես էի, ով հայրենասիրությունից դրդված իր ամբողջ ունեցածը դրեց գրավ»,- «Առաջին լրատվական»-ի հետ զրույցում ասաց օֆշորային սկանդալի գործով տուժած՝ գործարար Փայլակ Հայրապետյանը՝ անդրադառնալով նույն գործով դատապարտված Աշոտ Սուքիասյանի ազատության մեջ հայտնվելու լուրին։
Նշենք, որ Աշոտ Սուքիասյանը այս գործով առանցքային մեղադրյալն էր։ Նա 2017 թվականին Էրեբունի և Նուբարաշեն ընդհանուր իրավասության դատարանի դատավոր Վարդան Գրիգորյանի նախագահությամբ դատապարտվեց 16 տարվա ազատազրկման: Դատարանը վճռել է մոտ 8 մլրդ 919 մլն դրամ բռնագանձել՝ հօգուտ Փայլակ Հայրապետյանի, և 632 մլն 403 հազար դրամ՝ հօգուտ Հայրապետյանի որդու:
Աշոտ Սուքիասյանը Հայրապետյաններին ոչ մի կոպեկ չի վերադարձրել։ Փայլակ Հայրապետյանը «Առաջին լրատվական»-ի հետ զրույցում ասաց, որ նա 6 տարի անազատության մեջ մնալուց հետո հարկայինի հետ ունեցած հաշիվները փակել է և հայտնվել է ազատության մեջ։
Աշոտ Սուքիասյանը իրականում վերաքննիչ դատարանում բողոքարկել է առաջին ատյանի որոշումը և վերաքննիչ դատարանի կողմից արդարացվել ու 2020 թվականի հունվարի 31-ին քրեակատարողական հիմնարկից ազատ արձակվել։ Դատարանը համարել է, որ Սուքիասյանը խարդախությամբ և փողերի լվացմամբ չի զբաղվել, այլ հարկերից, տուրքերից կամ պարտադիր այլ վճարումներից չարամտորեն խուսափել է։ Սուքիասյան էլ վճարել է այդ հարկեր-տուրքերը և հայտնվել ազատության մեջ:
«Ես ի սկզբանե էլ գիտեի, որ այսպես է լինելու։ Աշոտ Սուքիասյանը ինձ ասում էր՝ լավ եմ արել, խաբել եմ, չխաբնվեիր։ Ասում էր՝ ինչ է եղել որ, 6 տարի է՝ կգնամ կնստեմ, դուրս կգամ։ Այդպես էլ եղավ։ Իրենք գիտեին, որ սենց է լինելու։ Նախապես կազմակերպել էին ինքն ու իր ընկերները՝ Կճոյանն ու Տիգրան Սարգսյանը, ովքեր աղաղակում էին, որ օֆշորային փաստաթղթերում իրենց ստորագրությունները չեն, կեղծվել են, բայց ես փորձաքննության որոշում եմ ստացել, որ ստորագրությունները իրական են, ու իրենք են ստորագրել»,- ասաց Հայրապետյանը։
Հիշեցնենք, որ տարիներ առաջ Փայլակ Հայրապետյանը, բանկի գնահատմամբ, 33 միլիոն դոլարի անշարժ գույք էր գրավադրել, որպեսզի Հայաստանում ադամանդի վերամշակման գործարան կառուցվեր և Աֆրիկայի Սիեռա Լիոնե հանրապետությունից հումքը ներկրվեր Հայաստան և վերամշակվեր։ Հայրապետյանին պատկանող մի քանի տասնյակ անշարժ գույք էր գրավադրվել «Ամերիաբանկում», որի հիման վրա տրված վարկային միջոցները յուրացվել էին հանցավոր խմբի կողմից և ոչ մի դրամ նպատակին չէին ծառայեցվել։ Գումարները բանկից դուրս էին եկել, ապա փոխանցվել օֆշորային գոտում գրանցված հաշվեհամարների, որոնք բացված էին եղել նախկին վարչապետ Տիգրան Սարգսյանի, Արարատյան հայրապետական թեմի առաջնորդ Նավասարդ Կճոյանի ու Աշոտ Սուքիասյանի անուններով։ Արդյունքում վարկային պարտավորությունները չկատարելու համար բանկը Հայրապետյանի ամբողջ ունեցվածքը հանեց վաճառքի, ու նա ամեն ինչ կորցրեց:
«Ամեն ինչ վաճառեցին, ոչ մի բան չմնաց։ Բանկը 33 միլիոն էր գնահատել, բայց ես մի 70 միլիոն դոլարի ունեցվածք կորցրի։ Ինձ թալանեցին։ Ընդ որում, բանկը որ սաղ ծախել է, սաղ իրանց մարդկանց է ծախել, ուրիշ մարդ չի առել։ Իրենց մեջ ծախեցին իմ տարիների ստեղծածը, ու դրա համար ոչ մեկը պատասխան չտվեց»,- ասաց Հայրապետյանը։
Փայլակ Հայրապետյանը Աշոտ Սուքիասյանի արդարացվելու վերաբերյալ վճռաբեկ բողոք է ներկայացրել, որի պատասխանը դեռ հայտնի չէ։ Վճռաբեկ դատարանի պատասխանը, Հայրապետյանի խոսքով, մինչև փետրվարի վերջը հայտնի կլինի։ «Այդ պետական մասշտաբով կազմակերպված հանցագործության համար պետք է, չէ՞, որևէ մեկը պատասխան տա։ Աշոտ Սուքիասյանը չպետք է լինի ազատության մեջ, և ես հասնելու եմ դրան»,- եզրափակեց գործարարը։
