Խորհրդարանի քաղաքական մեծամասնությունը՝ «Իմ քայլը» խմբակցությունը հայտարարեց, որ Սահմանադրական դատարանի հետ կապված խորքային ճգնաժամը կհանգուցալուծվի համաժողովրդական հանրաքվեի միջոցով: Թեմայի շուրջ «Առաջին լրատվական»-ի հետ զրույցում «Եվրասիա համագործակցության հիմնադրամի» Մարդու իրավունքների ծրագրի տնօրեն Իզաբելա Սարգսյանը նշեց. «Ողջունելի է, որ հարցը վերջապես լուծում կստանա, միգուցե ավելի ուշ, քան հնարավոր էր, բայց արդեն լուծման տարբերակն ընտրված է, և եթե նախագահը ստորագրի, արդեն կհայտարարվի հանրաքվեի օրը: Հանրաքվեն հեշտ ճանապարհ չէ: Ըստ գործող Սահմանադրության 207-րդ հոդվածի՝ ընտրելու իրավունք ունեցողների առնվազն մեկ քառորդը պետք է կողմ քվեարկի սահմանադրական փոփոխություններին: Դա բավականին մեծ թիվ է, իսկ հանրաքվեներին սովորաբար ամբողջ աշխարհում ցածր մասնակցություն է գրանցվում՝ 30-40 տոկոս: Այնուամենայնիվ, հանրաքվեի մասնակիցների 90 տոկոսը «այո» կասի սահմանադրական փոփոխություններին:
Այս հանրաքվեն ևս ինչ-որ առումով լինելու է իշխանության վստահության հանրաքվե: Անդրադառնալով այս դիտարկմանը՝ Ի. Սարգսյանը նշեց, որ շատ բարդ է լինելու մարդկանց նորից մոտիվացնել՝ գնալ ընտրատեղամասեր. «Շատ կարևոր է, թե ինչ մարտավարություն է ընտրելու «այո»-ի ճամբարը, ինչպես նաև կարևոր է լրատվամիջոցների և քաղհասարակության դերը»: Մեր զրուցակցի խոսքով՝ այս հանրաքվեն յուրօրինակ թեստ կդառնա քաղհասարակության համար. «Դաշտը բաժանված է «սևի և սպիտակի», միշտ քաղաքացիական հասարակության և լրատվամիջոցների գործառույթն է եղել զսպող դեր հանդիսանալը. բացահայտել խնդիրները, բարձրաձայնել և անկողմնակալ դեր ունենալ»:
Մանրամասն՝ տեսանյութում:
