Լոռու մարզի Աքորի համայնքում հունվարի 23-ից սկսած մինչ օրս գրանցվում են խոզերի անկման դեպքեր։
Գյուղացիների խոսքերով՝ այս օրերին միայն իրենց համայնքում 200-ից ավելի խոզ է անկել, բայց մինչ օրս պատկան մարմինները պատշաճ քննություն չեն իրականացրել:
Աքորի համայնքի բնակիչ Կարեն Ավետյանը պատմեց, որ դեռևս հունվարի 17-ին է տեսել, որ խոզերից մեկը կեր չի ուտում, իսկ արդեն հունվարի 23-ին անկում է ունեցել, որից հետո խոզերի անկումը մասսայական բնույթ է կրել։
«Անկումը մինչև օրս շարունակվում է։ Մենակ իմ անկած խոզերի գլխաքանակը հասնում է 100-ի, իսկ հարևաններին էլ հետը մոտ 200-ի։ Եվ սա մենակ պաշտոնական գրանցված, ակտավորված դեպքերը։ Պլյուս կան դեպքեր, որ չեն ասում, չեն ակտավորում։ Ինձ մոտ գրանցված անկման դեպքերից հետո մարզային կառույցից ու Թումանյանի տարածաշրջանի պետը եկավ, երկու նմուշառում արեցին և ուղարկեցին լաբորատորիա։ Փորձաքննության ուղարկելուց հետո երեկ ինձ պատասխանեցին, որ ինֆեկցիա է, բայց ես իրենց չեմ վստահում, չեմ հավատում և պահանջել եմ կրկնակի փորձաքննություն նշանակել»,- ասաց Աքորի գյուղի բնակիչը՝ հավելելով, որ վտանգավոր հիվանդությունների մասով՝ կլասիկ ժանտախտի և աֆրիկյան ժանտախտի մասով որևէ հետազոտություն չի իրականացվել։ «Ճիշտ է, մենք գյուղացի ենք, բայց մենք հիմար չենք։ Մենք բոլորս էլ կասկածում ենք՝ կամ կլասիկ ժանտախտ, կամ աֆրիկյան ժանտախտ։ Բայց որևէ լուրջ հետազոտություն չի իրականացվել, մեզ որևէ խորհուրդ չի տրվել։ Իսկ այս վիճակը նրա հետևանքն ա, որ ընդհանուր բուժմիջոցառումները լավ չեն կատարվել, մինչև վերև սխալ տեղեկություն ա տրվում։
Պատվաստումները չեն արվում։ Հիմա էլ մեզ խաբում են։ Ինչ-որ մեկը չի ուզում, որ այս վիճակը բարձրաձայնվի, ճիշտ գնահատական տրվի։ Սա պրիմիտիվ խաբեություն է, ինձ թվում է՝ համաճարակ է, բայց չեն ուզում պաշտոնապես դրա մասին հայտարարել։ Բայց ես ուզում եմ իմանալ, թե իմ խոզերը ինչից են սատկում։ Ես հո դրա իրավունքը ունեմ»,- ասաց մեր զրուցակիցը՝ հավելելով, որ հարակից համայնքներում էլ են նման դեպքեր գրանցվում, բայց չի բարձրաձայնվում։
Գյուղացին նշեց, որ մինչ այս պահը անկած խոզերի մարմինները իրենք թաղել են, բայց մարդիկ կան, ովքեր տեսնում են, որ խոզերը վատառողջ են, ավելի էժան գնով վաճառում են միսը. «Ես անձամբ հորել եմ անկած խոզերը, բայց վաճառքի դեպքեր էլ կարող է եղած լինեն։ Ես դա չեմ բացառում»։
Կարեն Ավետյանը նշեց, որ չստանալով իր հարցերի պատասխանները, առաջիկայում պատրաստվում է գալ Երևան, մասնագետներ գտնել ու ստանալ իր հարցերի պատասխանները։
Սննդամթերքի անվտանգության տեսչական մարմնից «Առաջին լրատվական»-ին փոխանցեցին, որ արդեն մեկ շաբաթ է, որ այդ խնդիրն ի հայտ է եկել, իրենց տվյալներով՝ 22 խոզ է անկել, նոր անկումների մասին իրենք չեն տեղեկացվել:
«Այդ 22-ը թաղվել են, իրականացվել են ախտահանման աշխատանքներ, նմուշներ են վերցվել փորձաքննության համար: Փորձաքննության արդյունքները պարզ կլինեն մյուս շաբաթ, կհրապարակենք»,- փոխանցեցին ՍԱՏՄ-ից՝ բացառելով այդ ռիսկային գոտուց մսի վաճառքի դեպքերը. «Համայնքը, իրավիճակը մեր հսկողության տակ է, ամեն օր տեսուչը գնում և ստուգում է։ Այդ տնտեսությունները մեկուսացված են»,- ասացին ՍԱՏՄ-ից։
