1999թ. հոկտեմբերի 27-ին Ազգային ժողովում տեղի ունեցած և ցայսօր չբացահայտված ահաբեկչությունը բացահայտելու համար դեռ անցյալ տարվա դեկտեմբերի 18-ին Ազգային ժողովի զոհված փոխնախագահ Յուրի Բախշյանի այրին՝ Անահիտ Բախշյանը, դիմել էր գլխավոր դատախազություն՝ պահանջելով վերացնել Հոկտեմբերի 27-ի գործից անջատված մասի կարճման որոշումն ու սկսել նոր քննություն։ Բախշյանի բողոքը բավարարվել էր, քրեական գործի վարույթը կարճելու մասին նախաքննության մարմնի 2004թ. նոյեմբերի 11-ի որոշումը վերացվել էր, և քրեական գործով նախաքննությունը հանձնվել էր Ազգային անվտանգության ծառայությանը։ Այս ընթացքում Հոկտեմբերի 27-ի ոճրագործության պարագլուխ Նաիրի Հունանյանն էր նամակ գրել վարչապետ Նիկոլ Փաշինյանին, որն էլ իր հերթին այն հասցեագրել էր դատախազությանը, նա էլ՝ ԱԱԾ-ին՝ Հոկտեմբերի 27-ի գործի անջատված մասով քննությանը ներգրավելու համար։
Հայտնի դարձավ, որ Հոկտեմբերի 27-ի գործով անջատված մասով ԱԱԾ-ում ստեղծվել է քննչական խումբ։ Դատախազությունը մասամբ բավարարել է Հոկտեմբերի 27-ի գործով տուժողի իրավահաջորդ Անահիտ Բախշյանի միջնորդությունը, որով նա խնդրել էր նաև անջատված մասով քննչական խումբ ստեղծել։ Բախշյանը միջնորդել էր քրեական գործը փոխանցել քննչական այլ ենթակայության՝ Ազգային անվտանգության ծառայությունից հանձնելով Հատուկ քննչական ծառայությանը, ինչը մերժվել էր։
Քաղաքագետների միության նախագահ, ահաբեկչության հետևանքով տուժած ԱԺ պատգամավոր Հմայակ Հովհաննիսյանն, օրինակ, օրեր առաջ «Առաջին լրատվական»-ին տված հարցազրույցում հիշեցրել էր, որ ահաբեկչության պարագլուխ Նաիրի Հունանյանը եղել է ԱԱԾ գործակալ, ԱԱԾ-ի վերահսկողության ներքո, ուստի ԱԱԾ-ին գործի քննությունը հանձնարարելը չի բխում դրա շահերից, քանի որ ԱԱԾ-ն առաջնորդվելու է իր գերատեսչության մունդիրի պատիվը պահելու առաքելությամբ։ Միաժամանակ թե՛ նա, թե՛ Հոկտեմբերի 27-ին ՀՀ ներքին գործերի նախարար Սուրեն Աբրահամյանը, որը ոճրագործությունից հետո հրաժարական տվեց պաշտոնից, չեն բացառել, որ կարող են քննչական խմբում ներգրավել նաև ԱԱԾ-ի պրոֆեսիոնալ քննիչներին։
Հայաստանի Ժողովրդական կուսակցության փոխնախագահ, ԱԺ նախկին պատգամավոր Գրիգոր Հարությունյանից հետաքրքրվեցինք, թե որքանով է նպատակահարմար Հոկտեմբերի 27-ի գործի քննությունը վստահել ԱԱԾ-ին, երբ հենց ժամանակին ԱԱԾ-ի անփութության, բացթողումների պատճառով տեղի ունեցավ ահաբեկչությունը։
«Եթե այդպես նայենք, ապա Հատուկ քննչական ծառայությունը, իրավապահ մյուս մարմիններն էլ են ժամանակին ծառայել նախկին իշխանություններին։ Բոլորն էլ ծառայել են նախկին իշխանություններին, և եթե դա հաշվի առնենք, ապա ոչ մի գործի քննություն չպետք է վստահենք նրանց»,- «Առաջին լրատվական»-ի հետ զրույցում կարծիք հայտնեց ՀԺԿ փոխնախագահը։
Իրավապահ համակարգի ուսերին այսօր առանց այն էլ բազմաթիվ քրեական գործերի բացահայտման բեռն է դրված, որքանո՞վ է իրատեսական Հոկտեմբերի 27-ի գործի քննությունը հանձնարարել և ակնկալել, որ այն կբացահայտվի։
«Ժամանակին ես կարծիք հայտնել եմ, որ արդյունավետ քննություն անցկացնելու համար այսօր իրավապահ մարմինները գերծանրաբեռնված են աշխատում։ Բայց եթե դատախազությունն այսօր այդ գործն ուղարկել է ԱԱԾ-ին, նշանակում է, որ ի վիճակի են քննելու այդ գործը, իսկ թե ինչ որակի քննություն կանցկացվի՝ ցույց կտա ժամանակը։ Բարդ գործ է, բայց անհուսալի չէ բացահայտումը։ Նկատի ունենանք, որ ահաբեկչության պարագլուխն էլ է ցանկություն հայտնել խոսելու։ Ես միանշանակ մնում եմ այն կարծիքին, որ կան կազմակերպիչներ, և շրջանակը միայն ահաբեկչություն գործած անձանցով չի սահմանափակվում»,- ասաց Գրիգոր Հարությունյանը։
