«Ես միշտ ընթացքի մեջ եմ, աշխատում եմ հաղթահարել խոչընդոտները: Միշտ ինչ-որ բան պրպտում եմ, փորձում եմ հասնել նպատակներիս և հնարավորությունները կարծես թե Աստված ինքն է ուղարկում: 2019-ին գեղեցիկ սկավառակ թողարկեցի՝ նվիրված Կոմիտասի 150-ամյակին՝ Հանրային ռադիոյի առաջարկով, և ձայնագրությունները նվիրեցի Հանրային ռադիոյի ֆոնդին: Ձայնագրեցի ակապելա 40 երգ, ծաղկաքաղ էի արել ժողովրդական ժողովածուներից»,- այս մասին «Առաջին լրատվական»-ի հետ զրույցում ասաց երգչուհի, ՀՀ վաստակավոր արտիստ Աննա Մայիլյանը:
Հարցին՝ համերգ կկայանա, թե ոչ, Աննա Մայիլյանը պատասխանեց, որ, անշուշտ, կկայանա, և միաժամանակ մտահոգություն հայտնեց. «Դա, իհարկե, հնարավորությունների հետ է կապված: Մենք չունենք համապատասխան ֆոնդեր, կազմակերպչական կենտրոններ, որոնց շնորհիվ իմ ոլորտի կատարողները կկարողանան առանց մտահոգության ունենալ բեմ, բոլորս «եղունգ ունես՝ գլուխդ քորի» տարբերակով ենք աշխատում»:
Կա կարծիք, որ մեզանում դասական երաժշտության նկատմամբ հետաքրքրությունը նվազում է և, թերևս, կգա մի շրջան, երբ դասական երաժշտությունն ունկնդիր չի ունենա: Ադրադառնալով այս դիտարկմանը՝ Աննա Մայիլյանը նշեց, որ արտասահմանյան շուկան զարգանում է և անընդհատ նորամուծություններ են արվում թե՛ բեմում, թե՛ կազմակերպչական գործունեության մեջ… «Մեզ մոտ դա չի արվում, նորամուծությունները քննադատվում են: Աշխարհը գնում է առաջ, թեև բոլոր միտումները չէ, որ պետք է ընդունվեն, բայց այն ամենը, ինչը կարող է մեր մշակույթն առաջ մղել և մեր արտիստին բարձրացնել, պետք է օգտագործվի: Մենք չունենք կազմակերպիչներ, որոնք ճիգեր կգործադրեն ոլորտի զարգացման համար»:
«Մշակույթը անկում է ապրում, դա համընդհանուր խնդիր է, բայց կան նաև շատ լավ երիտասարդներ»,- նշեց մեր զրուցակիցը:
Մանրամասն՝ տեսանյութում:
