Գրասենյակներում կորոնավիրուսով վարակվելու ամենավտանգավոր վայրը վերելակն է: Այս մասին գրում է «Մոսկովսկի կոմսոմոլեց»-ը՝ ՉԺՀ-ի առողջապահության պետական կոմիտեի հատուկ հանձնաժողովի ղեկավար Չժուն Նանշանին հղումով:
Վերելակներում վատ օդափոխություն է. խցիկների չափը հաճախ ավելի փոքր է, քան զուգարաններինը: Վերելակով մենակ տեղափոխվելիս մարդը կարծում է, թե անվտանգ միջավայրում է՝ մոռանալով, որ խցիկում ինչ-որ մեկը կարող էր փռշտալ կամ հազալ մինչև նրա մտնելը: Կորոնավիրուսը մարդու օրգանիզմից դուրս կենսունակությունը պահպանում է մինչև երկու օր չոր մակերևույթների վրա, իսկ հեղուկ միջավայրում՝ ավելի երկար, ուստի վերելակի կոճակները նույնպես կարող են վարակի աղբյուր հանդիսանալ:
Չինացի բժիշկները խորհուրդ են տալիս վերելակներից օգտվել միայն դիմակով, և կոճակները չսեղմել բաց ձեռքերով: Իսկ հետո ձեռքերը լվանալ օճառով առնվազն 20 վայրկյան:
Փետրվարի 5-ի դրությամբ, 2019-nCoV տեսակի կորոնավիրուսից մահացել է 492 մարդ: Հիվանդության բռնկում առաջին անգամ գրանցվել է Չինաստանի Ուհան քաղաքում՝ 2019-ի դեկտեմբերի վերջին: Բացի Չինաստանից, հիվանդությունը հայտնաբերվել է ավելի քան 20 երկրներում: