Արագածոտնի մարզի Ագարակ համայնքում ընթացիկ տարվա մարտի 15-ին տեղի կունենան համայնքի ղեկավարի արտահերթ ընտրություններ:
Ինչպես փոխանցում է «Արմենպրես»-ը, այդ մասին որոշման նախագիծն ընդգրկված է կառավարության փետրվարի 6-ի նիստի օրակարգում:
Ագարակ համայնքի ղեկավար Վահան Խաչատրյանն այդ պաշտոնում ընտրվել էր 2016 թվականի սեպտեմբերի 18-ին կայացած ընտրության արդյունքում: «Տեղական ինքնակառավարման մասին» օրենքի 26-րդ հոդվածի 1-ին մասի 1-ին կետով նախատեսված հիմքով, այն է՝ համայնքի ղեկավարի կողմից 2019թ. դեկտեմբերի 26-ին հրաժարականի դիմում ներկայացնելու, դեկտեմբերի 26-ին Ագարակ համայնքի ավագանին կազմել է համայնքի ղեկավարի լիազորությունները վաղաժամկետ դադարեցնելու մասին արձանագրություն:
Վերոնշյալ որոշումը ՀՀ Արագածոտնի մարզպետի միջոցով ներկայացվել է տարածքային կառավարման և ենթակառուցվածքների նախարարություն:
Կենտրոնական ընտրական հանձնաժողովի 2019 թվականի հուլիսի 9-ի №35-Ա որոշմամբ սահմանված մոտակա օրն է 2020 թվականի մարտի 15-ը: Արագածոտնի մարզի Ագարակ համայնքի ղեկավարի արտահերթ ընտրության անցկացման համար առաջարկվում է այդ օրը:
