Իտալական Off-White-ը կրկին ճանաչվել է որպես աշխարհում ամենահանրահայտ հագուստի ապրանքանիշ: Այդ մասին են վկայում նորաձևության ոլորտում սպառողի վարքագծի վերլուծության մեջ մասնագիտացած Lyst հարթակի ուսումնասիրության արդյունքները:
Հաղթողին որոշելու համար մասնագետները միլիոնավոր հարցումներ են ուսումնասիրել որոնողական համակարգերում, սոցցանցերում և առցանց մանրածախ վաճառքի կայքերում: Այսպիսով, 2019-ի չորրորդ եռամսյակում առաջին տեղը գրավել է Off-White-ը, որը նաև նախորդ, երրորդ եռամսյակի առաջատարն էր:
Փորձագետների կարծիքով, դրան նպաստել է, մասնավորապես, ընկերության պատկերանշանի փոփոխությունը, Մայամիում նոր բուտիկի բացումը, ինչպես նաև երաժիշտ Ջասթին Բիբերի և մոդել Հեյլի Բոլդուինի հարսանիքը, որի ժամանակ վերջինս Off-White ապրանքանիշի զգեստով էր:
Վարկանիշային աղյուսակի երկրորդ հորիզոնականը զբաղեցրել է իտալական Gucci նորաձևության տունը՝ ֆրանսիական Balenciaga-ին ետ մղելով երրորդ տեղը: Նորաձևության արդյունաբերության ամենապահանջարկված տասը ընկերությունների ցանկում են նաև Moncler-ը, Versace-ն, Fendi-ն և Prada-ն: