Սիրիայի՝ ռազմավարական չափազանց մեծ կարևոր նշանակություն ունեցող Իդլիբ նահանգում թեժ իրավիճակ է ստեղծվել, գրանցվել է բախումների նոր ալիք՝ այս անգամ թուրքական ստորաբաժանումների և սիրիական կառավարական բանակի ստորաբաժանումների միջև, երկու կողմից էլ կան զոհեր: Թուրքիայի նախագահ Ռեջեփ Թայիփ Էրդողանը ստեղծված իրավիճակի համար մեղադրել է նաև Ռուսաստանին: Թեմայի շուրջ «Առաջին լրատվական»-ը զրուցել է արաբագետ Սարգիս Գրիգորյանի և «Օրբելի» կենտրոնի փորձագետ Կարեն Վերանյանի հետ:
«Իդլիբը մնացել էր այն թեժ առանձնացող կետերից մեկը, որը ցամաքային գործողությունների տրամաբանության մեջ չէր մտնում այս տարիների ընթացքում… Իդլիբն այս առումով առանձնանում էր: Բազմիցս եմ ասել, որ Իդլիբով է սկսելու սիրիական հակամարտության կարգավորումը: Իհարկե ցավալի է, որ այստեղ բախումներ են տեղի ունենում, բայց, ամեն դեպքում, ինչ-որ գործընթաց է տեղի ունենում, որը երկար ժամանակ չէր նկատվում այս հատվածում»,- ասաց Սարգիս Գրիգորյանը:
Կարեն Վերանյանի դիտարկմամբ՝ Ռուսաստանի և Թուրքիայի երկկողմ հարաբերություններում կան և՛ ընդհանուր շահեր, և՛ հակասություններ․ «Կան կոնկրետ հարցեր, թեմաներ, այդ թվում՝ Իդլիբի հետ կապված, որտեղ Մոսկվայի և Անկարայի հակասություններն ակնհայտ են, դժվարանում եմ ասել՝ արդյոք կողմերը այս պահին կկարողանան այդ հարցում գնալ հստակ տարանջատման, շահերը կոմպրոմիսի բերել, ավելի շուտ կփորձեն այլ հարթություններում, իրենց համատեղ շահերի հետ մեկտեղելով, հավասարակշռման եզրեր գտնել… Շատ հետաքրքիր է, որ այս ամեն ինչը տեղի է ունենում այն ժամանակ, երբ Միացյալ Նահանգները և Իրանը փորձում են դուրս գալ սուր ճգնաժամային իրավիճակից: Հիմա շատ լավ առիթ է ստեղծվել և՛ Ռուսաստանի, և՛ Թուրքիայի համար՝ օգտվելու իրավիճակից և լրացնել բացը…»:
Առավել մանրամասն՝ տեսանյութում։
