Թաիլանդի Չաչենկսաու շրջանում հազվագյուտ գենետիկ մուտացիայով շուն է ծնվել: Այս մասին հայտնում է The Sun-ը:
Կիրակի՝ փետրվարի 2-ին Ֆումման ընտանիքի շունը մի քանի ձագեր է ունեցել: Տերերը նրանց տեղափոխել են զամբյուղի մեջ, որպեսզի նրանք չմրսեն, եւ ձագերից մեկի մոտ ֆիզիկական արատ են հայտնաբերել: Կենդանին մեկ աչք ուներ, այն էլ՝ գլխի մեջտեղում:
Մինյոնների հետ նմանության պատճառով շուն-ցիկլոպին անվանել են Կեւին: Տերերն անհանգստացել են շնիկի առողջության համար, սակայն մի քանի օր հետո հասկացել են, որ նրա մոտ ամեն ինչ լավ է: Դեռ պարզ չէ՝ տեսնում է շնիկն իր միակ աչքով, թե ոչ, քանի որ շներին մոտ երկու ամիս է հարկավոր, որ տեսողությունն ամբողջովին զարգանա:
Ոչ սովորական շնիկի ծնվելու մասին իմացել են հարեւանները եւ սկսել են շնիկին տեսնելու համար այցելության գալ: Նրանք գտնում են, որ մուտանտ-շնիկի ծնվելը լավ նշան է, եւ նրա ծննդյան օրվա թվանշաններն օգտագործել են վիճակախաղերի մեջ: Շատ ծանոթներ էլ Ֆումմաններից ցանկացել են վերցնել շնիկին, սակայն տերերը որոշել են, որ իրենք կմեծացնեն կենդանուն: