Նոր տիպի կորոնավիրուսի տարածումը առայժմ չի վերաճել համավարակի: Այդ մասին փետրվարի 4-ին հայտնել են Առողջապահության համաշխարհային կազմակերպությունում՝ տեղեկացնում է interfax-ը:
«Մենք ունենք համաճարակ՝ տարածման բազմաթիվ օջախներով»,-ասել է ԱՀԿ-ի համավարակային և Էնդեմիկ հիվանդությունների դեպարտամենտի տնօրեն Սիլվի Բրիանը մամուլի ասուլիսի ընթացքում: Նա հավելել է, որ ներկայում Չինաստանի սահմաններից դուրս կորոնավիրուսով հիվանդանալու դեպքեր են գրանցվել 23 երկրում:
Համավարակ է համարվում խիստ ընդգրկուն համաճարակը, որը տարածվում է համաշխարհային մասշտաբով:
Մասնավորապես, ԱՀԿ-ն համավարակ էր հայտարարել 2009 թվականին H1N1 գրիպի տարածման կապակցությամբ, որը նաև անվանում են «խոզագրիպ»:
Չինաստանի առողջապահության պետական կոմիտեի տվյալներով՝ երկրում 2019-nCoV կորոնավիրուսի հարուցած թոքաբորբով հիվանդության հաստատված դեպքերի թվաքանակը փետրվարի 4-ին կազմել է ավելի քան 20,4 հազար, մահաբեր ելքերի թիվն ավելացել է մինչև 425: Հիվանդացածների թվաքանակն անցած օրվա համեմատությամբ աճել է 3,2 հազարով, իսկ մահացածների թիվը՝ 64-ով: Գրեթե 2,8 հազար հիվանդների վիճակը գնահատվում է ծանր: Եվս 171,3 հազար բնակիչ գտնվում է կարանտինում:
Առողջապահության համաշխարհային կազմակերպությունը, Չինաստանում բռնկած հիվանդության կապակցությամբ հրապարակելով առավել հրատապ հարցերն ու պատասխանները, պարզաբանել է, որ բժշկական դիմակները չեն պաշտպանում 2019-nCoV կորոնավիրուսից, սակայն դրանք ունակ են նվազեցնելու վարակման ռիսկը: «Բժշկական դիմակ կրելը կարող է օգնել սահմանափակելու շնչուղիների հիվանդությունը: Սակայն սոսկ դիմակի օգտագործումը վարակից պաշտպանություն չի երաշխավորում և պետք է զուգակցվի մյուս նախազգուշական միջոցների հետ՝ ներառյալ ձեռքերի հիգիենան և շնչուղիների հիգիենան»,- արձանագրել է ԱՀԿ-ն:
«Շնչուղիների հիգիենա» ասելով կազմակերպության փորձագետները նկատի ունեն «1 մետրից ոչ պակաս հեռավորություն» պահպանելը «իր և մյուս մարդկանց միջև»:
ԱՀԿ-ն խորհուրդ է տվել դիմակն օգտագործել «ռացիոնալ» կերպով՝ խուսափելու համար «արժեքավոր միջոցների անհարկի ծախսումից»:
ԱՀԿ-ն նշել է, որ Չինաստանից ծանրոցներն անվտանգ են: Մյուս կորոնավիրուսների բռնկումների փորձից հայտնի է, որ դրանք «երկար չեն մնում այնպիսի առարկաների վրա, ինչպիսիք են նամակերն ու ծանրոցները։
