«Առաջին լրատվական»-ը անդրադարձել էր ՀՀ վարչական դատարանում քննվող ընդդեմ Ազգային անվտանգության նախկին ղեկավարների ընդունած վարչական ակտերի դեմ բողոքներին։ Մենք գրել էինք, որ սա հետհեղափոխական Հայաստանում բացառիկ երևույթ է և բացառիկ է այնքանով, որ նախկին իշխանությունների ապօրինի որոշումները փաստացի պաշտպանվել են նաև նախկին ԱԱԾ տնօրեն Արթուր Վանեցյանի կողմից։ Ընդդեմ ԱԱԾ-ի հայց ներկայացրած Գևորգ Խաչատրյանը մեզ հետ զրույցում պատմել էր, որ հայցը վերաբերում է ԱԱԾ նախկին տնօրեն Գեորգի Կուտոյանի ապօրինի հրամանին, որը ինքը ներկայումս վիճարկում է Վարչական դատարանում։ Ակտը կայացվել էր ԱԱԾ տնօրենի առաջին տեղակալ Կարապետ Դավթյանի միջնորդությամբ և վերաբերում է Խաչատրյանին ապօրինի կերպով ծառայությունից արձակելուն՝ աշխատանքից հեռացնելուն։
Ներկայումս տվյալ գործով ընթանում են հետաքրքիր զարգացումներ։ Վերջերս վարչական դատարանը միջանկյալ դատական ակտ էր կայացրել հօգուտ Գևորգ Խաչատրյանի, որը ԱԱԾ-ն ներկայումս բողոքարկել է վարչական վերաքննիչ դատարան։ Գևորգ Խաչատրյանը մեզ պատմեց, որ գործն ինքնին աննախադեպ է այնքանով, որ բողոքարկվում է մի վարչական ակտ, որը ոտքից գլուխ ապօրինի է և բնորոշում է այդ ծառայությունում նախկինում թույլ տրված ապօրինություններն ու կամայականությունները:
«Այս գործով հիմնավորվում է, որ այդ հիմնարկի որոշ ապաշնորհ ղեկավարներ, մասնավորապես այդ ժամանակ ԱԱԾ տնօրենի առաջին տեղակալ գեներալ-մայոր Կարապետ Դավթյանը, ում վերաբերյալ չկա գեթ մեկ ազգային անվտանգության աշխատակից, ով դրական կարծիք կունենա, կամայական, լկտի և բնականաբար ապօրինի կերպով ինձ արձակել է զինվորական ծառայությունից՝ կարգապահական պատճառներից ելնելով։ Ինչ վերաբերում է բուն գործին, ապա ասեմ, որ վերաքննիչ վարչական դատարանը բավականին հետաքրքիր որոշում կայացրեց այս միջանկյալ դատական ակտի վերաբերյալ: Նախ ասեմ, որ մերժեց ԱԱԾ բողոքը՝ թողնելով ուժի մեջ վարչական դատարանի որոշումը, ֆիքսելով շատ կարևոր հանգամանք առ այն, որ ի սկզբանե ազգային անվտանգության մարմնի վարչական ակտը փաստացի չունենալով՝ ես զրկված եմ եղել այն վիճարկելու դատարանում, որը երաշխավորված է ՀՀ Սահմանադրությամբ և Մարդու իրավունքների և հիմնարար ազատությունների մասին եվրոպական կոնվենցիայով, այդ իսկ պատճառով բողոքը մերժեց՝ հիմք ընդունելով արդար դատաքննության հիմնարար իրավունքի գերակայությանը, որի համար կարող եմ միայն երախտիքս հայտնել օրինականության հաստատման գործում վարչական և վերաքննիչ վարչական դատարաններին՝ ԱԱԾ ճնշումներին ընդդիմանալու և օրենքի էությունը և ոգին պահելու համար։ Ներկայումս ԱԱԾ-ն վերը նշված վերաքննիչ վարչական դատարանի որոշումը բողոքարկում է վճռաբեկ դատարանում, իսկ գործը մակագրվել է դատավոր Գոռ Հակոբյանին»,- ասաց Խաչատրյանը՝ հավելելով, որ հույս ունի՝ արդարացի և օբյեկտիվ քննություն կիրականացվի վճռաբեկ դատարանի կողմից, և արդարությունը կհաղթի։
Գևորգ Խաչատրյանից նաև հետաքրքրվեցինք՝ ինչու հնարավոր չեղավ այս հարցը լուծել ԱԱԾ-ի ներսում և գործը հասավ դատարան: «Հարցը գերատեսչությունում լուծում չստացավ մեկ պարզ պատճառով, որ Արթուր Վանեցյանը և նրա նման նախկին ռեժիմի մնացորդներ շատ կան, նույնիսկ մերօրյա ԱԱԾ-ում։ Շատ ուրախ եմ, որ նրա կերպարը և էությունը շուտ բացահայտվեց։ Արթուր Վանեցյանի կերպարը, կարծում եմ, բոլորին է արդեն պարզ, ինչպե՞ս կարող էր նա իր տերերի ընդունած որոշումը չեղարկել։ Դա է պատճառը, որ գերատեսչական լուծում չստացվեց, իսկ նրա լարած դավերը դեռ թանկ կնստեն մեր պետության համար։ Կարծում եմ՝ վարչապետի հիասթափությունը իր ընտրության և նրան ԱԱԾ տնօրեն նշանակելու հարցում ամեն հարցի պատասխանը տվել է»,- ասաց Խաչատրյանը:
Նա հավելեց. «Ինչ վերաբերում է ներկայիս ղեկավարին, ճիշտն ասած՝ ես, որպես ԱԱԾ կադրային սպա, անձամբ ճանաչում եմ պարոն Մարտիրոսյանին և բարձր կարծիք ունեմ թե՛ որպես պրոֆեսիոնալի և թե՛ անձնական որակների տեր անձնավորության մասին, սակայն ցավով պիտի փաստեմ, որ նա շարունակում է իր ընկերոջ՝ Արթուր Վանեցյանի ընտրած մարտավարությունը, իսկ դրա պատճառների մասին այսօր ես չեմ կարող բարձրաձայնել, քանի որ դրանք զուտ ենթադրություններ են։ Սակայն կարող եմ միանշանակ ասել, որ նրանք այդքան համարձակություն չունեն ընդունելու և փաստելու, որ նախկինները ԱԱԾ-ում էլ գործել են ապօրինություններով և սխալվել են»։
