«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, վերջին օրերի ընթացքում ուշագրավ իրադարձություններ են տեղի ունենում։ Նախկին համակարգն ամբողջ ուժով դիմադրում է, և կրկին ակտիվացել են հակահեղափոխական վտանգի մասին մտահոգությունները։ Արդյոք կարծում եք, որ նախկիններն ունե՞ն ռևանշ իրականացնելու մտադրություն։
– Ես չեմ կարծում, որ այժմ հնարավոր է այնպիսի միավորում ստեղծել, որին ժողովուրդը վստահի ու դուրս գա հաղթանակած իշխանության դեմ, հակահեղափոխություն իրականացնի։ Ձեր նշած մարդիկ այն քաղաքական ուժերն են, անհատները, որոնք վերջին 20 տարվա ընթացքում այնքան չարիք են գործել, որոնց ժողովուրդը չի ընդունի։ Միգուցե 100 կամ 200 մարդ փորձի արկածախնդրություն անել, բայց դա էլ եմ քիչ հավանական համարում։
– Իսկ այդ իրավիճակում իշխանությունների մեղավորությունը տեսնո՞ւմ եք՝ այն իմաստով, որ նախկինների հանդեպ չափազանց մեղմ գտնվեցին։
– Բնական է՝ այն քաղաքական կուրսը, որ որդեգրել է հեղափոխությամբ եկած իշխանությունը, հենց այսպիսի իրավիճակ էլ ենթադրում էր։ Շատերն ավելի կտրուկ քայլեր էին ակնկալում, որ ամեն ինչ միանգամից իր տեղը դրվեր։ Իշխանությունները ուզում են ամեն ինչ օրենքով անել ու կամաց-կամաց ամեն ինչ իր տեղը դնել։ Վստահ եմ, որ իշխանությունները կկարողանան իրականացնել նախանշված ծրագիրը, մենք դրա համար կյանք ենք տվել։ Եթե նախկինները վերակենդանանան՝ մեր երկրի վերջը կգա։
Յուրաքանչյուր գիտակից հայ պետք է կանգնի իշխանության կողքին այդ ծրագիրն իրականացնելու համար։ Այդ ծրագրերին դեմ է նախկին իշխանությունը, որովհետև իրենք իրենց էությամբ հանցագործ են, գիտեն, որ կամաց-կամաց բոլորն էլ պատասխան պետք է տան։ Եթե դատական պրոցեսը մտավ դատավարական նորմալ փուլ, ամեն ինչ ջրի երես դուրս կգա՝ ոնց են թալանել, ինչ դավաճանություններ են արել մեր երկրի հանդեպ։ Մի այսպիսի խոսք կա՝ մեկը մահանալուց է լինում, բերանն անընդհատ բացում-փակում է, տղան ասում է՝ ինչի ես բերանդ բացում-փակում, ասում է՝ որ իմանաք ողջ եմ, չտանեք թաղեք։ Հիմա սրանցն է, կենդանության նշաններ են ցույց տալիս, իրենց թիմին են ուզում ոգևորել, որ ցիրուցան չլինեն։ Իրենք շատ փոքր տոկոս են կազմում ու չեն կարողանա այս երկրում բան փոխել։
– Քոչարյանը բանտից խոսում է իշխանություններին հեռացնելու իրեն վիճակված բախտի մասին, նշում է, որ «կոնսենսուս մինուս մեկն» արդեն կայացել է։ Ո՞ւմ վրա է հույս դրել՝ ըստ Ձեզ։
– Ինքը դա ավելի շատ իր ներքին լսարանի համար է անում, դուխ է տալիս, որպեսզի վերջին մնացորդները կողքից չփախնեն։ Ինքն էլ գիտի, որ իր ասածն աբսուրդ է, պարզապես փորձում է համախմբված պահել իր կողքը։ Պարզապես ինքն ինչ-որ ակնկալիքներ ունի, որ ժամանակ ձգելով ինչ-որ բան փոխվի այս երկրում։ Բայց ոչինչ չի փոխվելու։ Մենք բոլորս պետք է սատարենք, որ իշխանությունները կարողանան բարեփոխումների ծրագիրն իրականացնել։ Վերջին մեկ տարվա մեջ տեղի ունեցած ամենակարևոր բանը հավատի վերականգնումն է։ Այլ խնդիր է, որ այսօր նախկինները փորձում են անվստահության մթնոլորտ սերմանել, ցույց տալ, թե այս իշխանությունները թուլամորթ են։ Հիմա եթե գային բոլորին գնդակահարեին՝ ի՞նչն էր փոխվելու, պետք է արդարադատություն իրականացվի։ Բոլորը պետք է իրենց արած հանցագործությունների համար պատասխան տան։
– Իսկ մտահոգիչ չէ՞, որ իշխանությունները կադրերի հարցում այսպիսի սխալներ են թույլ տալիս, Վանեցյանի նման պոտենցիալ հակահեղափոխականին նշանակում ԱԱԾ ղեկավար։
– Միջին և ցածր օղակներում ամբողջությամբ նախկին կազմի ներկայացուցիչներն են, որոնք տարբեր տեսակի թալանի մասնակից են եղել։ Բնական է, որ իրենք ևս վտանգ են ներկայացնում։ Պետք է արդար դատական համակարգ ձևավորվի։ Ես կարծում եմ, որ այսօր Սահմանադրական դատարանի անհրաժեշտություն առհասարակ չկա, կարող է առաջին ատյան լինել ու գերագույն դատարանի նման մի բան, և վերջ։ Կամ անցումային արդարադատության տարբերակով՝ բոլոր հանցագործներին հավաքել, մեկուսացնել ու նորմալ կառավարման համակարգ ձևավորել։ Նրանք ընդամենը ժողովրդի հոգեբանության վրա են ազդում, ուրիշ ոչինչ։ Կրկնում եմ՝ Քոչարյանի հայտարարություններն ընդամենը իր թիմի մնացորդներին դուխ տալու միջոց են, որ վերջնականապես ցիրուցան չլինեն։