Հայաստանում ռուսական Orsis ռազմարդյունաբերական ընկերության շահերը ներկայացնող փաստաբանի գործունեությանը խոչընդոտելու փաստով նոր քրեական գործ է հարուցվել: Այս մասին հայտնում է РИА Новости՝ վկայակոչելով սեփական աղբյուրը։
Գործակալության տվյալներով, նոր գործը վերաբերում է ոչ թե բուն գործընթացին, այլ ՀՀ պաշտպանության նախարարության աշխատակցի կողմից Orsis ընկերության շահերը ներկայացնող փաստաբանի գործնեությանը խոչընդոտելուն:
Նշվում է, որ 2019 թվականի սկզբերին՝ ի նշան համագործակցության ամրապնդման, ORSIS ռուսական ընկերության հայկական դուստր Arms ընկերությունը ՀՀ պաշտպանության նախարարությանը նվիրել է հրացան, որը, սակայն, ՀՀ ՊՆ հաշվեկշռում գրանցվելու փոխարեն գրանցվել է փոխնախարարներից մեկի անունով։
ՀՀ Հատուկ քննչական ծառայության մամուլի խոսնակ Մարինա Օհանջանյանը РИА Новости-ի հետ զրույցում հաստատել է նոր քրգործ հարուցելու փաստը՝ առանց մանրամասներ ներկայացնելու:
Հիշեցնենք, որ 2019 թվականին մի քանի միլիոն դոլարի ռազմատեխնիկայի մատակարարման մրցույթի ձախողումից հետո ընկերությունը հայտնվել էր սև ցուցակում: Ավելի ուշ ռուսական ընկերության ներկայացուցիչների բողոքների հիման վրա ORSIS-ը հանվել էր սև ցուցակից։
