Երևանի ընդհանուր իրավասության դատարանի՝ Շենգավիթ վարչական շրջանում գտնվող նստավայրում Վաչե Մարգարյանի նախագահությամբ ավարտվել է Վազրիկ Մ.-ի գործի դատական քննությունը:
46-ամյա Վազրիկ Մ.-ին մեղադրանք էր առաջադրված զինված ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 4-րդ կետով:
Վազրիկ Մ.-ն բարձրագույն կրթություն ունի, աշխատել է «Երևան-Տրանս» ՓԲԸ-ում որպես գծային վերահսկողության ճարտարագետ, նրա խնամքին են երեք անչափահաս երեխաները, կրտսեր որդին 9 տարեկան է:
Ըստ մեղադրանքի՝ Վազրիկ Մ.-ն ուրիշի գույքը ավազակությամբ հափշտակելու նպատակով 2019 թվականի հունիսի 10-ին վերցրել է իրեն պատկանող, գործարանային արտադրության ինքնալիցքավորվող ողորկափող որսորդական հրացանը՝ 6 հատ 12 տրամաչափի փամփուշտներով, սպորտային պայուսակ, դեմքը ծածկելու նպատակով դրել է «Քեթրին» գրառմամբ նարնջագույն սպորտային գլխարկ՝ հովարով, արևային ակնոցներ ու ժամը 16-ն անց 45-ի սահմաններում գնացել է Երևանի Թոթովենցի փողոցում գործող՝ Հայբիզնեսբանկի Նոր Նորքի մասնաճյուղ:
Դեռ ներս չմտած՝ բանկի մուտքի դիմաց Վազրիկ Մ.-ն հանդիպել է այդ ժամանակ բանկում ծառայություն իրականացնող, ոստիկանության պահպանության բաժնի ոստիկան Հայկազ Մայիլյանին:
Ըստ մեղադրանքի՝ Վազրիկ Մ.-ն հենց այդ պահին իր հետ նախապես վերցրած, որպես զենք գործադրված որսորդական հրացանով հարձակվել է ոստիկանի վրա, նրա կյանքի և առողջության համար վտանգավոր բռնություն գործադրելու սպառնալիքով պահանջել է մի կողմ քաշվել: Սակայն ոստիկան Հայկազ Մայիլյանը, իրականացնելով իր ծառայողական պարտականությունները, դիմադրել է՝ փորձել է կասեցնել Վազրիկի մուտքը բանկի տարածք: Միևնույն ժամանակ, ըստ մեղադրանքի ձևակերպման, ոստիկանը, գիտակցելով, որ հարձակվողն իր մոտ եղած որսորդական հրացանից կարող է կրակել, բռնել է հրացանի փողից և այն ուղղել է օդ:
Վազրիկ Մ.-ն, ըստ մեղադրանքի, իր դիտավորությունն իրագործելու նպատակով հրել է ոստիկանին և, այնուամենայնիվ, մուտք է գործել բանկի մասնաճյուղ ու հասցրել է մեկ կրակոց արձակել ներսում: Որևէ մեկը, բարեբախտաբար, չի վնասվել:
Բանկի սպասարկման սրահում գտնվող մի քաղաքացի օգնության է հասել ոստիկան Հայկազ Մայիլյանին, նրանք միասին կարողացել են ուժի գործադրմամբ բանկից դուրս բերել Վազրիկ Մ.-ին: Ահազանգով դեպքի վայր հասած ոստիկանները վնասազերծել են նրան ու բերման են ենթարկել ոստիկանության բաժին:
Զինված հարձակումը բարեբախտաբար ու ցուցաբերված դիմադրության շնորհիվ ավարտվել է առանց մարդկային կորուստների՝ ի տարբերություն, մասնավորապես, ավելի վաղ HSBC բանկի մասնաճյուղի վրա դարձյալ մեկ անձի՝ այն ժամանակ՝ ոստիկանության գնդապետի կատարած զինված հարձակման, որից Վազրիկ Մ.-ն, ցավոք, հետևություններ չէր արել ու զենքը ձեռքին դիմել էր ամենավտանգավոր հանցատեսակներից մեկի իրագործման անհեռատես քայլին:
Դատարանում Վազրիկ Մ.-ն իրեն լիովին մեղավոր է ճանաչել մեղսագրված արարքի համար, զղջացել է: Նախաքննության ընթացքում նա հրաժարվել էր դիրքորոշում հայտնելուց և ցուցմունքներ տալուց:
Տուժող Հայկազ Մայիլյանը ամբաստանյալ Վազրիկ Մ.-ի դեմ բողոք, պահանջ առաջ չի քաշել:
Սթափության վիճակի զննության արձանագրության համաձայն՝ դեպքի պահին Վազրիկ Մ.-ն եղել է ալկոհոլ օգտագործած վիճակում, բայց՝ առանց հարբածության նշանների, ինչի պատճառով դատարանը ալկոհոլ օգտագործած վիճակը չի դիտել որպես ամբաստանյալի պատասխանատվությունն ու պատիժը ծանրացնող հանգամանք: Երևի՝ «ի պետս քաջության» էր քիչ քանակությամբ օգտագործել…
Նախկինում Վազրիկ Մ.-ն դատապարտված չի եղել:
Աշխատանքի և բնակության վայրերից նա դրական է բնութագրվել:
Դատարանը հաշվի է առել նաև կատարված արարքի հանրային վտանգավորության բարձր աստիճանը և եզրահանգել է, որ Վազրիկ Մ.-ն պետք է դատապարտվի իրական ազատազրկման:
Վազրիկ Մ.-ն մեղավոր է ճանաչվել ՀՀ քրեական օրենսգրքի 175 հոդվածի 2-րդ մասի 4-րդ կետով և դատապարտվել է ազատազրկման 6 տարի ժամկետով՝ առանց գույքի բռնագրավման: Պատժի սկիզբը՝ 2019 թվականի հունիսի 10-ից:
