Ինչպես հայտնում է The Daily Mirror-ը, SwagSec հաքերական խումբը կոտրել է Լեդի Գագայի պաշտոնական կայքը և այնտեղից գողացել գրանցված օգտատերերի անձնական տվյալների մի մասը:
Հարձակման է ենթարկվել երգչուհու Բրիտանիայում գրանցված ladygaga.co.uk կայքը: Այն կոտրել են դեռևս հունիսի 27-ին, սակայն հարձակման հետևանքների մասին հայտնի է դարձել միայն հիմա: Հաքերների ձեռքում են հայտնվել հազարավոր օգտատերերի անուններն ու էլեկտրոնային հասցեները:
Universal-ը, որի հետ համագործակցում է Լեդի Գագան, հայտարարել է, որ պլաստիկ քարտերի համարներն ու այլ ֆինանասական տվյալներ չեն գողացվել: «Մենք լուրջ ենք վերաբերվում տեղի ունեցածին և մտադիր ենք անձնական տվյալների պաշտպանության լրացուցիչ միջոցների դիմել: Այն օգտատերերը, որոնք կապ ունեն այս հարձակման հետ, արդեն տեղեկացվել են»,- ասված է ընկերության հայտարարության մեջ:
Ավելի վաղ նույն SwagSec խումբը հասցրել է հարձակվել Էմի Ուայնհաուսի կայքի վրա, որը նույնպես համագործակցում է Universal-ի հետ: Չարագործները ջնջել են էջի ամբողջ պարունակությունը և դրել իրենց մանիֆեստը: Այդ «փաստաթղթում» հաքերները իրենց անվանել են «աֆրո-ամերիկյան գեյ-հասարակության հպարտ ներկայացուցիչներ» և խոստացել են համացանցն ազատել «սպիտակ հրեշից»:
