Facebook-ի ղեկավար Մարկ Ցուկերբերգը հայտարարել է, որ որոշել է արմատապես փոխել սոցիալական ցանցի քաղաքականությունը, չնայած դա կարող է շատ մարդկանց զայրացնել: ԱՄՆ Յուտա նահանգի Սոլթ Լեյք Սիթի քաղաքում կայացած հանդիպման ժամանակ նա խոստացել է վերանայել օգտագործողի կողմից տեղադրված բովանդակության սկզբունքները և տվյալների գաղտնագրում կատարել՝ հայտնում է CNN- ը:
Ըստ Ցուկերբերգի՝ նախկինում Facebook-ը փորձել է բոլորին գոհացնել և գործել այնպես, որ ոչ մեկին չնեղացնի, բայց դրա պատճառով տուժել են ընկերության սկզբունքները: Հաջորդ տասնամյակում սոցցանցի ղեկավարությունը ցանկանում է, որ իրեն ըմբռնումով մոտենան:
«Սա նոր մոտեցում է, և ես կարծում եմ, որ դա վրդովելու է շատերին: Անկեղծ ասած, հին մոտեցումը նույնպես վրդովում էր շատերին, այնպես որ եկեք նոր բան փորձենք, – բացատրել է նա: -Նախևառաջ խոսքը լրացուցիչ գրաքննության մասին է, քանի որ Facebook-ին կոչ են անում ջնջել այնքան շատ գրառումներ, որ այդ պատճառով նրան անհարմար վիճակի մեջ են դնում»:
Սոցցանցի ղեկավարը նշել է, որ Facebook-ում նախկինի պես տեղ չեն ունենա իսկապես վնասակար բովանդակությամբ գրառումները, ինչպիսիք են ահաբեկչության և բռնության կոչերը կամ երեխաների շահագործման հետ կապված գրառումները: Այնուամենայնիվ, հավելել է նա, պետք է լինի մի որևէ սահման, որտեղից գրառումների հեղինակների համար սկսվում է խոսքի ազատությունը:
