Նովոսիբիրսկի բնակչի կողմից վարձված մարդասպանը հրաժարվել է սպանել բնակարանի պատճառով և պատվիրատուին հանձնել է ոստիկանությանը, հաղորդում է «Կոմերսանտ»-ը:
Սպանության պատվիրատուն՝ 59-ամյա Սերգեյ Յանչուրկինը, ցանկանում էր տիրանալ Նովոսիբիրսկի Ժելեզնոդորոժնի շրջանում գտնվող անշարժ գույքին, որը պատկանում էր նրա նախկին կնոջը: Նպատակին հասնելու համար նա որոշում է վերացնել նախկին կնոջը, ինչպես նաև նրա հետ բնակվող 36-ամյա կնոջն ու նրա երեք տարեկան դստերը: Սպանությունն իրականացնելու համար նախկինում դատապարտված Յանչուրկինը դիմում է իր բանտախցի ընկերոջը: Որպես վարձատրություն նա խոստանում է բնակարանի վաճառքից ստացված գումարի կեսը:
Սպանությունն իրագործելուց առաջ մարդասպանը մի քանի անգամ հանդիպում է պատվիրատուին: Հանդիպումներից մեկի ժամանակ Յանչուրկինը նրան ատրճանակ և փամփուշտներ է հանձնում, ինչպես նաև բնակարանի բանալիները, որտեղ ապրում էին զոհերը: Սակայն վարձու մարդասպանը հրաժարվում է հանցագործությանը մասնակցելու իր մտարությունից և այդ մասին տեղեկացնում է ոստիկանությանը: Նա համաձայնում է աշխատել հետաքննության հետ: Ենթադրյալ սպանության օրը տղամարդը պատվիրատուին է հանձնում զոհերի փաստաթղթերը՝ երկու անձնագիր և մեկ ծննդյան վկայական՝ որպես կատարված աշխատանքի ապացույց: Նույն օրը Յանչուրկինը ձերբակալվում է: Ըստ Զաելցովսկու շրջանի դատախազի, տղամարդը 14 տարվա ազատազրկման է դատապարտվել և պատիժը կկրի խիստ ռեժիմի գաղութում:
