Ճապոնացի միլիարդատեր Յուսակու Մաեձավան, որը հունվարին մրցույթ էր հայտարարել աղջիկների համար, որոնք կցանկանային իր հետ Լուսին թռչել և դառնալ իր կյանքի ընկերը, հայտարարել է ծրագրի դադարեցման մասին: Համապատասխան հայտարարությունը հրապարակված է Twitter-ի նրա էջում՝ տեղեկացնում է RIA Novosti-ն։
«Անձնական բնույթի պատճառներով ես նախօրյակին AbemaTV-ին տեղեկացրի հարսնախոսության շոուին այլևս չմասնակցելու՝ իմ որոշման մասին և այդ առնչությամբ պահանջեցի չեղյալ հայտարարել ծրագրերը»,- ասված է միլիարդատիրոջ հաղորդագրության մեջ:
Մաեձավան ճշտել է, որ հայտ է ներկայացրել ավելի քան 27,7 հազար մարդ: Մրցույթի սկզբնական պայմանների համաձայն՝ հայտեր կարող էին տալ նրանք, ովքեր «ամուսնացած չեն, 20-ից բարձր տարիքի են, տրամադրված են դրականորեն և ուրախ»:
Բացի դրանից, հավակնորդները պետք է պատրաստ լինեին լրջորեն ձեռնամուխ լինել թռիչքի նախապատրաստմանը: «Ես գիտակցում եմ, որ հիասթափեցրել եմ բազմաթիվ մարդկանց: Բոլորից ներողություն եմ խնդրում իմ անվայել գործողությունների համար»,- հավելել է նա մի այլ հաղորդագրության մեջ։
