Մեծ Բրիտանիայում ոստիկանական շունը տղամարդուն օգնել է գտնել զայրույթի պահին շպրտած ամուսնական մատանին: Այս մասին հայտնում է UPI-ն:
Դեպքը տեղի է ունեցել հունվարի 25-ի գիշերը: Հերթապահ կոնստեբլը Օդին անունով շան հետ շրջայց էր կատարում թաղամասում, երբ ճանապարհին լապտերներով երկու տղամարդու է նկատել: Պարզվել է, որ նրանցից մեկը կնոջ հետ վեճի ժամանակ շպրտել է ամուսնական մատանին:
«Հնարավոր է, որ տղամարդը մատանին շպրտել է զայրույթի պահին,- նշել է ոստիկանը:- Նա անմիջապես փոշմանել է արածի համար եւ փորձում էր գտնել մատանին»: Ոստիկանը որոշել է օգնել տղամարդուն եւ փնտրտուքին միացել է նաեւ Օդինը. Բառացիորեն 2 րոպե հետո շունը գտել է մատանին բարձր խոտի միջից:
«Խոտը մոտ 5 սանտիմետր բարձրություն ուներ: Իմ կարծիքով, նրանք մատանին կփնտրեին ամբողջ գիշեր եւ այդպես էլ չէին գտնի այն: Հաճելի է օգտակար լինել շրջապատի մարդկանց»,-նշել է հերթապահ ոստիկանը: