Նախկին նախագահ Ռոբերտ Քոչարյանը հրապարակել է իր հերթական հարցազրույցը, որը անդրադարձ է ներքին իրողություններին, տնտեսական և քաղաքական իրադրությանը, և որում նա կրկնում է իր «կոնսենսուս մինուս մեկ» բանաձևը: Ռ. Քոչարյանի հարցազրույցը հատկանշական է ներքին ընթացիկ իրողությունների ֆոնին: Ի՞նչն է ուշադրության արժանի:
Թեմայի շուրջ «Առաջին լրատվական»ի հետ քննարկմանը մասնակցեցին Հայ կառուցողական կուսակցության նախագահ Անդրիաս Ղուկասյանը, «Քաղաքացու որոշում» կուսակցության անդամ, վերլուծաբան Գոռ Մադոյանը, «Սասնա ծռեր» կուսակցության անդամ Կարո Եղնուկյանը:
«Այսօր հինգերորդ շարասյան ղեկավարը Նիկոլ Փաշինյանի թույլ տված սխալները օգտագործում է այս իշխանությունների դեմ,- նշեց Կարող Եղնուկյանը:- Քոչարյանն ազատություն է ուզում, և դա ստանալու համար նա պետք է իրեն դնի քաղբանտարկյալի տեղ և իր վրա ուշադրություն գրավի»:
Անդրիաս Ղուկասյանի դիտարկմամբ՝ մոտենում է ՄԻԵԴ-ի եզրակացության ժամանակը, և այս խմորումները փոխկապակցված են նաև դրա հետ. «Սա քաղաքական ֆոն ստեղծելու փորձ է՝ իրավիճակին զուգահեռ, որպեսզի ՄԻԵԴ-ը Քոչարյանին մեղսագրված հոդվածը ճիշտ չհամարի… Բարդ դիլեմայի առաջ են կանգնելու քննիչները: Իրադարձությունների սրվածությունը նաև քաղաքական դաշտում պետք է արտապատկերում ունենա, և Քոչարյանը իր հարցազրույցը պիտի կցի իր հերթական բողոքին՝ ասելով, որ ինքը քաղաքական գործիչ է»:
Գոռ Մադոյանի խոսքով՝ քաղաքական դաշտը ձևավորման փուլում է, բայց հին ավանդույթները մնացել են:
«ՍԴ դատարանի նախագահին քաղաքական գործոն դարձնելու մեջ իշխանությունն ունի իր մեղքի բաժինը: Հեղափոխությունից հետո Սահմանադրությունը պետք է չեղարկվեր. այդ հարցը ուշ դրվեց»,- նշեց Կարող Եղնուկյանը՝ ընդգծելով, որ հնարավոր չէ հեղափոխություն անել նախկին կոռումպացված ռեժիմի Սահմանադրությամբ:
ՍԴ նախագահն ասում է՝ գնալու եմ մինչև վերջ: Սա քաղաքակա՞ն հայտարարություն է. անդրադառնալով այս հարցին՝ Անդրիաս Ղուկասյանը նշեց. «Իմ կարծիքով՝ Հրայր Թովմասյանը չի կարող հիմա հրաժարական տալ, որովհետև «դրույքաչափերը» շատ բարձր են՝ հնարավոր է, որ մահապատժով են նրան սպառնում, եթե այս իրավիճակում նա թողնի այդ պաշտոնը, նրան կսպանեն. ռևանշիստներն այդ մարդիկ են»:
Անդրիաս Ղուկասյանը նաև ընդգծեց, որ կարևոր, հանգուցային պետական ատյաններում կան մարդիկ, որոնք ժամանակին ակնհայտորեն համագործակցել են հանցավոր ռեժիմի հետ, և դա իր հետևանքներն է ունենում:
Մանրամասն՝ տեսանյութում: