«Մենք ունենք պրոֆեսիոնալ բանակ»,- այս մասին «Առաջին լրատվական»-ի հետ զրույցում ասաց պաշտպանության նախկին նախարար Վաղարշակ Հարությունյանը՝ հավելելով, որ պատերազմի դեպքում պետք է իրականացվի ծառայություն անցած մարդկանց մոբիլիզացիա: « Ամենադժվար հարցը զինվորի, սպայի բարոյահոգեբանական խնդիրն է. զինվորը և սպան ձևավորվում են առաջին գծում, այնտեղ է, որ ամեն ինչ հասկանում են և պատերազմի դեպքում կարողանում են հստակ գործել»,- նշեց նախկին նախարարը՝ հավելելով, որ հայկական բանակը մի կողմից համապատասխանում է ռազմաքաղաքական իրավիճակին, մյուս կողմից՝ մեր ֆինանսական հնարավորություններին:
Սահմանին հարաբերական անդորրը, Վաղարշակ Հարությունյանի խոսքով, ունի բացատրություն՝ կապված թե՛ տարածաշրջանում, թե՛ նաև Հայաստանում տիրող իրավիճակի հետ. «Կարևոր գործոն է Թուրքիան: Թուրքիային այսօր ձեռնտու չէ Ղարաբաղյան հակամարտությունը, քանի որ խնդիրներ ունի թե՛ տարածաշրջանում, թե՛ Եվորպայի և ԱՄՆ-ի հետ, ինչպես նաև ներքին խնդիրներ: Մենք գործ ունենք թուրք-ադրբեջանական դաշինքի հետ, որտեղ միշտ որոշում է կայացնում «մեծ եղբայրը»:
Երկրորդ՝ Հայաստանում ստեղծված է մի իրավիճակ, երբ բյուջեն ավելանում է և զնեք-զինամթերք է ձեռք բերվում. այս իրավիճակում Ադրբեջանը չի գնում անդորրը խախտելու քայլին, որպեսզի տարածաշրջանում չմեծացնի լարվածությունը»:
Վաղարշակ Հարությունյանը, անդրադառնալով դիտարկմանը, որ հակառակորդը հրաժարվել է դիվերսիոն պայքարից, ընդգծեց. «Դա մեր գործողությունների արդյունքն է: Հակառակորդի դիվերսիոն խմբերը բացահայտվում են դեռ շփման գիծը չհատած»:
Անդրադառնալով Ապրիլյան պատերազմին՝ պաշտպանության նախկին նախարարը նշեց, որ դա լայնածավալ պատերազմ չէր. Բաքուն շանտաժով քաղաքական նպատակ էր հետապնդում: «Քաղաքական նպատակը եղել է տարածքներ վերադարձնելը… Ռազմական առումով նպատակը շփման գիծը փոփոխելն էր, բայց քանի որ չկարողացան իրականացնել, սկսելուց երկու օր հետո զինադադար խնդրեցին»,- նշեց նախկին նախարարը՝ հավելելով, որ հայկական կողմը հնարավորություն ուներ հրաժարվելու զինադադարի առաջարկից:
Մանրամասն՝ տեսանյութում:
