Կա կարծիք, որ Հայաստանի իշխանությունների առջև ծառացած կարևորագույն մարտահրավերներից է վերականգնել հավատը պետական ինստիտուտների հանդեպ: Հեղափոխությունից հետո, թվում էր, թե դա շատ հեշտ շտկվելիք հարց է, քանի որ մի ամբողջ հասարակություն միահամուռ ուժերով մերժեց նախկին համակարգը: Սակայն այսօր կա վստահության ճգնաժամ այդ ինստիտուտների հանդեպ:
«Առաջին լրատվական»-ի հետ զրույցում անդրադառնալով այս դիտարկմանը՝ դրամատուրգ, հրապարակախոս Կարինե Խոդիկյանը նշեց. «Կարծում եմ՝ պատեհ առիթը ճիշտ չօգտագործվեց, ներուժը չհաշվարկվեց, կադրային սխալ քաղաքականություն վարվեց, ոգևորության ալիքի՝ էյֆորիայի մեջ այսօրեականը դարձավ ավելի էական, քան հիմնականը. սրանցից ամեն մեկը շատ լուրջ պատճառ է: Շատ կարևոր է, թե ինչ թիմ ես հավաքում, և քո շուրջը ինչի համար են հավաքվում… Անցել է այսքան ժամանակ, և ես, օրինակ, չգիտեմ՝ ինչն է միավորում ԱԺ պատգամավորներին, կառավարության անդամներին»:
«Պետական ինստիտուտների նկատմամբ անվստահության առաջին ճեղքը թաքնված պարգևավճարներն էին»,- ընդգծեց Կարինե Խոդիկյանը՝ հավելելով, որ ամեն տոնից հետո ժողովուրդը սկսում է դրանք հաշվարկել:
«Հայտնվել ենք երկդիմի իրավիճակում. երբ քննադատում ենք իշխանությանը, ոմանք չարախնդում և ուրախանում են, լռում ենք, չի լինում: Ժամանակն է, որ հենց իշխանությունները կարողանան հասկը որոմից ջոկել և հասկանալ՝ ով ինչ է ասում: Ես շատերին եմ լսում տարբեր լրատվամիջոցներով, այնքան խելացի մտքեր են հնչում, այնքան ճիշտ առաջարկներ են արվում. մտածում եմ՝ ինչու ականջալուր չեն լինում: Վերջապես պետք է հասկանալ, որ ժամանակն է պրոֆեսիոնալների և գաղափարական նվիրյալների թիմ հավաքել, որոնք կռիվ չեն տա պարգևավճարների համար»,- նշեց Կ. Խոդիկյանը: Նա նաև ընդգծեց, որ երբ հայտարարություններ են արվում՝ օդի մեջ կրակոցների նման, և դրանց գործողություններ չեն հետևում, դրանից տուժում է վստահությունը, մինչդեռ բարեփոխումների համար առաջին օգնականը վստահությունն է:
Դրամատուրգի դիտարկմամբ՝ երբ պատասխանում եք «խայթոցներին», արժևորում եք «խայթողին» և բարձրացնում նրա կարգավիճակը: «Եկեք դադար տանք, էդ ֆեյսբուքից դո՛ւրս եկեք՝ նախարարությունից մինչև գերատեսչություն, կառավարությունից մինչև Ազգային ժողով, հերի՛ք է ստատուսներ գրեք, հերիք է լայքերը հաշվեք, երկիրը դրանցով չի կառուցվում: Եվ հերիք է դրանցով առաջնորդվեք»,- կոչ արեց մեր զրուցակիցը:
Մանրամասն տեսանյութում:
