Սյունիքի մարզի ընդհանուր իրավասության դատարանում Գնել Գասպարյանի նախագահությամբ ավարտվել է Հովհաննես Ս.-ի գործի դատական քննությունը:
Ըստ մեղադրանքի՝ 22-ամյա Հովհաննես Ս.-ն՝ պարտադիր ժամկետային զինծառայող, կոչումով՝ շարքային, ընդգրկված լինելով մարտական հերթապահության մեջ, 2018 թվականի սեպտեմբերի 11-ին, ժամը 20-ն անց 20-ի սահմաններում մարտական դիրքի առաջնագծի խրամուղում դիտորդի պարտականությունները կատարելու ժամանակ իր հետ որպես դիտորդ կարգված պարտադիր ժամկետային զինծառայող, կոչումով շարքային Վահե Հ.-ի կողմից քնելու կապակցությամբ վիճաբանել է նրա հետ:
Վահեն նրա հասցեին հայհոյանք է հնչեցրել, վեճը թեժացել է: Հովհաննեսը նույնպես հայհոյանքներ է հնչեցրել Վահեի հասցեին, քաշքշել է նրան, «զույգ ձեռքերով բռնել է Վահեի պարանոցից, սեղմել է, ապա իրեն ամրակցված ինքնաձիգի ապահովիչը դրել է մենահատ կրակոցի դիրքում, լիցքավորել է ինքնաձիգը, փողն ուղղել դեպի Վահեն ու նրան վնաս պատճառելու դիտավորությամբ սեղմել է ձգանը՝ արձակելով երեք մենահատ կրակոց Վահեի ուղղությամբ»:
Արդյունքում Հովհաննեսը Վահեի առողջությանը պատճառել է միջին ծանրության վնաս՝ աջ ձեռքի երկրորդ մատի պատռված վերքի, ձախ նախաբազկի շրջանի հրազենային, գնդակային միջանցիկ վիրավորման ձևով:
Բացի այդ՝ արձակված կրակոցները դիպել են Վահե Հ.-ի ձեռքին եղած ջերմատեսիլ սարքին, շարքից հանել են այն՝ սարքը դարձրել են ոչ պիտանի հետագա շահագործման կամ վերանորոգման համար:
Հովհաննես Ս.-ն, ըստ մեղադրանքի, ծառայակցի առողջությանը դիտավորությամբ պատճառել է միջին ծանրության վնաս, նաև՝ անզգուշությամբ ոչնչացրել է ռազմական գույք հանդիսացող ջերմատեսիլ սարքը՝ առաջացնելով ծանր հետևանքներ՝ պետությանը պատճառելով 2 միլիոն 392 հազար 500 դրամին համարժեք գույքային վնաս:
Հովհաննես Ս.-ին մեղադրանք է առաջադրվել ՀՀ քրեական օրենսգրքի 359 հոդվածի 2-րդ մասի 3-րդ, 4-րդ կետերով և 370 հոդվածով:
Որպես խափանման միջոց՝ Հովհաննես Ս.-ի նկատմամբ սկզբում ընտրվել է կալանավորումը, ապա կալանավորումը վերացվել է, նա հանձնվել է հրամանատարության հսկողությանը:
Դատարանում Հովհաննես Ս.-ն իրեն լիովին մեղավոր է ճանաչել: Դատարանը հաշվի է առել, որ Հովհաննես Ս.-ն զորամասի հրամանատարության կողմից բնութագրվում է դրական, նախկինում դատապարտված չի եղել: Որպես պատասխանատվությունն ու պատիժը մեղմացնող հանգամանք է գնահատվել առաջադրված մեղադրանքում իրեն լիովին մեղավոր ճանաչելը, զղջալը:
Պատասխանատվությունն ու պատիժը ծանրացնող հանգամանքներ ի հայտ չեն բերվել:
Հովհաննես Ս.-ն մեղավոր է ճանաչվել մեղսագրված արարքների համար և վերջին հաշվով դատապարտվել է 2 տարի ազատազրկման: Այս պատժին հաշվակցվել է նախնական կալանքի տակ գտնված ժամկետը՝ 2018 թվականի սեպտեմբերի 12-ից մինչև 2019 թվականի մայիսի 11-ը՝ 7 ամիս 29 օր:
Հովհաննես Ս.-ի նկատմամբ կիրառվել է Համաներման ակտի համապատասխան դրույթը, և նա ազատվել է պատժի կրումից:
Հովհաննես Ս.-ից կբռնագանձվի 2 միլիոն 392 հազար 500 դրամ՝ որպես հանցագործության հետևանքով պետությանը անմիջականորեն պատճառված գույքային վնասի հատուցում: