2019 թվականի հիմնական ձեռքբերումը, անշուշտ, Պաշտպանության բանակի առջև դրված գլխավոր խնդրի՝ Արցախի Հանրապետության պետական սահմանի պաշտպանության արդյունավետ կատարումն է, և, որպես արդյունք, մեր ժողովրդի համար ևս մեկ խաղաղ ապրելու և արարելու տարի: Այս մասին ասել է ՊԲ հրամանատար Կարեն Աբրահամյանը՝ ամփոփելով 2019թ. բանակային տարին:
Նրա խոսքով՝ այդ ձեռքբերումների հետևում ՊԲ ողջ անձնակազմի ամենօրյա քրտնաջան աշխատանքն է:
«Ձեռքբերումները կարելի է նշել գոհացուցիչ, սակայն նշում եմ, որ կա շատ աշխատանք՝ տարբեր ուղղություններով»,- հավելել է Աբրահամյանը:
Ինչ վերաբերում է մարտական հերթապահությանը, հավելել է, որ այդ ոլորտում մեծածավալ աշխատանքներ են իրականացվել:
«Առաջին հերթին ես ուզում եմ նշել՝ հիմնական դրված նպատակ էր դրված բարձրացնել մեր զորքի անվտանգությունը և բարելավել կենցաղային պայմանները: Տարվա ընթացքում մի շարք զորամասերում բարելավվել են կենցաղային պայմանները, մենք ապահովել ենք մարտական դիրքերը խմելու ջրով, և բոլոր զորամասերում, մանավանդ մարտական հերթապահության կրման ժամանակ, պարենային ապահովման մասով բարելավվել է սննդի տեսականին:
ՊԲ հրամանատարը կարևորել է տեխնիկական հագեցվածության աստիճանի բարձրացման ցուցանիշները, որը հեշտացրել է ու իջեցրել անձնակազմի ծանրաբեռնվածության աստիճանը: Կառուցվել են ապաստարաններ, գետնատնակներ:
«Կապի համակարգում ստացել ենք այն ցուցանիշները, որն ապահովում է մեր հրամանատարության կողմից լիարժեք իրականացնել մարտական հերթապահության ղեկավարումը: Որակական զարգացում է ունեցել տարվա ընթացքում ՀՕՊ համակարգը»,- ասել է նա:
Ինչ վերաբերում է բանակի բարոյահոգեբանական վիճակին, ասել է, որ այս ոլորտում ունենք նվաճումներ:
«ՊԲ ողջ ընթացքում այս կարգի ցուցանիշներ չենք ունեցել»,- ասել է նա՝ հավելելով, որ այդ ոլորտում անելիքները շատ են:
Նրա խոսքով՝ բանակի ողջ անձնակազմի բարոյահոգեբանական վիճակը կայուն է, և իրենք պատրաստ են կատարել իրենց առջև դրված մարտական խնդրի կատարմանը:
Ինչ վերաբերում է հրադադարի ռեժիմի խախտումների քանակի մեջ զգալի նվազմանը, ՊԲ հրամանատարը ասել է հետևյալը.
«Առաջինը, որպես գործոն, քաղաքականն է: Քաղաքական գործոնի շրջանակում կառանձնացնեմ համագործակցության մեր ոլորտում աշխատանքը Մինսկի խմբի համանախագահների հետ: Ուզում եմ նշել, որ 2019թ. այս հանդիպումների և դիտարկումների, մոնիթորինգների անցկացման, նույնպես նախադեպ չի ունեցել: Այստեղ կուզենայի նշել Հայաստանի և Ադրբեջանի ղեկավարության հանդիպումներում ձեռք բերված այդ պայմանավորվածությունները: Որպես ռազմական գործոն՝ կնշեի մեր առաջապահ զորքի զգոն իրականացված ծառայությունը: Երկրորդն առաջնագծում իրականացված տեխնիկական հագեցվածության աստիճանի բարձրացումն է»:
Մանրամասները՝ տեսանյութում: