Լուրեր
Հայաստանում ժողովրդավարության համաթիվը բարձր է՝ անկախ կառավարության ջանքերից
  • 13:45
  • 2020-01-26
  • Դիտումներ՝ *

Economy Intelligence Unit-ը հրապարակել է 2019թ. Ժողովրդավարության համաթիվը: որը գնահատում է աշխարհում երկրների ժողովրդավարության մակարդակը: Զեկույցում ներառված են 165 պետությունների և 2 տարածքների տվյալներ: Համաթիվը կազմելիս հաշվի են առնվում մի շարք ցուցանիշներ, որոնք վերաբերում են 5 լայն խմբերի՝ ընտրական գործընթացներ և բազմակարծություն, կառավարության գործունեություն, քաղաքական ներգրավվածություն, քաղաքական մշակույթ և քաղաքացիական ազատություններ:

Երկրները բաժանվել են ռեժիմների 4 խմբի՝ լիարժեք ժողովրդավարություն, թերի ժողովրդավարություն, հիբրիդային ռեժիմ և ավտորիտար ռեժիմ:

Հայաստանի ընդհանուր միավորն այս զեկույցում 5, 54 է, ընտրական գործընթացների և բազմակարծության միավորը՝ 7, 50, կառավարության գործունեությունը՝ 5,36, քաղաքական ներգրավվածությունը՝ 6,11, քաղաքական մշակույթը՝ 3,13 և քաղաքացիական ազատությունները՝ 5,59:
Հայաստանը ցանկում 86-րդն է և ներառված է «հիբրիդային ռեժիմով» երկրների շարքում՝ իր դիրքերը նախորդ տարվա համեմատ բարելավելով 17 կետով:

Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» սոցիալ-դեմոկրատական կուսակցության գերագույն մարմնի անդամ Միքայել Նահապետյանը և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:

«Որոշ հարցերում բնականաբար կառավարությունը ունեցել է իր դերակատարությունը, սակայն Հայաստանում ժողովրդավարության համաթիվը բարձր է՝ անկախ կառավարության ջանքերից»,- ընդգծեց Միքայել Նահապետյանը՝ հավելելով, որ առաջընթացը մեծ է, քանի որ Հայաստանում տեղի են ունեցել ազատ ընտրություններ, քաղբանտարկյալներ չկան:

Դանիել Իոաննիսյանն արձանագրեց, որ քաղաքացիների մասնակցությունը պետական կառավարմանը հեղափոխությունից հետո բավականին ավելացել է: Նրա դիտարկմամբ՝ ժողովրդավարության համաթիվը բարձր է նաև սկսված բարեփոխումների պրոցեսների, ինստիտուցիոնալ փոփոխությունների շնորհիվ: «Չեմ կարող ասել, որ գոհ եմ բարեփոխումների արագությունից, որոշ ուղղություններով դանդաղկոտությունը սարսափելի է, այդուհանդերձ դրանք կան… Պետք է ավելի բարձր նշաձողեր վերցնել, չբավարարվել եղածով:»:

  • Դիտումներ՝ *