Նախորդ օրերին Ազգային անվտանգության խորհրդի քարտուղարը և Ազգային անվտանգության ծառայությունը իրար հակասող հայտարարություններ էին արել։ Ազգային անվտանգության խորհրդի քարտուղար Արմեն Գրիգորյանը երկրորդ անգամ և վստահաբար պնդել էր՝ ողջամիտ կասկածներ կան, որ ՀՀ-ում հեղաշրջում էր նախապատրաստվում, որի փորձը կանխվել է։
Իսկ նախօրեին, հիշեցնենք, Ազգային անվտանգության ծառայությունը հայտարարել էր, որ հեղաշրջման փորձ չի եղել։ Թեև ԱԱԾ-ի հայտարարությունը վերաբերում էր կոնկրետ ԱԱԾ նախկին պետ Արթուր Վանեցյանին։
Գործ ունենք ժամանակակից լրատվության մի ֆենոմենի հետ, որը կոչվում է վերնագրային ընթերցում: Կապանում տեղի ունեցող հաշվետու մամուլի ասուլիսի ժամանակ այսօր ասել է վարչապետ Նիկոլ Փաշինյանը՝ անդրադառնալով Անվտանգության խորհրդի քարտուղար Արմեն Գրիգորյանի այն հայտարարությանը, թե Հայաստանում հեղաշրջման փորձեր եղել են:
«Մարդիկ ոչ թե նյութն են կարդում, այլ՝ վերնագիրը: Արմեն Գրիգորյանը հենց կոնկրետ այդպիսի հայտարարություն չի արել: Արմեն Գրիգորյանը տվել է ձևակերպումներ, որոնք լրագրողին բերել են այդպիսի եզրակացության: Սրանք տարբեր բաներ են»,- ասել է նա:
Վարչապետը կարևոր է համարել հարցի պարզաբանումը: «Եթե Արմեն Գրիգորյանի ասածները ճշգրիտ ձևակերպենք կամ փորձենք դա մեկնաբանել, կարող ենք մեկնաբանել որպես հիբրիդային մի երևույթի նկարագրություն, և եթե այդպես ձևակերպենք, ապա կարող ենք դա անվանել հիբրիդային հեղաշրջման հիբրիդային նախապատրաստություններ»,- ասել է նա՝ նշելով, որ այն վերջնականապես պարտված և ջախջախված է:
Նա պարզաբանեց, թե ինչ նկատի ունի՝ հիբրիդային պրոցեսներ ասելով: Նշեց, որ դրա մաս է այն, որ տասնյակ միլիոնավոր դոլարներ են ծախսվում լրատվամիջոցներով և սոցիալական ցանցերով Հայաստանի ղեկավարի, նրա ընտանիքի անդամների, բարձրաստիճան պաշտոնյաների մասին սուտ տեղեկություններ տարածելու համար, և դա արվում է՝ ներգրավվելով քրեական աշխարհը, տարբեր ուժեր, կոռումպացված դեմքերի:
«Ինչո՞ւ է հեղաշրջում բառն այս պրոցեսի մեջ տեղավորվում: Որովհետև հընթացս այդ պրոցեսի մեջ ներգրավվում են նաև գործող պաշտոնյաներ, որոնք, լինելով իշխանության ներսում, գործում են ընդդեմ իշխանության: Դրա մեջ ներգրավված են լինում նախկին պաշտոյաներ, դրա մեջ ներգրավված են լինում դատական համակարգի որոշ ներկայացուցիչներ»,- ասել է նա:
Նիկոլ Փաշինյանն, իհարկե, մասամբ սրբագրել է Արմեն Գրիգորյանի կոշտ պնդումները, սակայն, ըստ էության, հանդես է եկել բավականին կտրուկ հայտարարություններով։
Փաշինյանը հրաժարվել է «հեղաշրջում» տերմինն օգտագործելուց՝ նախընտրելով «ռևանշիզմ» արտահայտությունը, մեկ այլ դեպքում՝ գործածելով «հիբրիդային հեղաշրջման երազանք» եզրը։
Սակայն տերմինաբանությունը խնդրի էությունն ամենևին էլ չի փոխում, ավելին՝ ուրվագծում է այն պատկերը, որի մասին ԶԼՄ-ները, փորձագետները խոսում են արդեն ամիներ շարունակ։ Նախկին համակարգը հեղափոխությունից հետո ինտենսիվորեն նախապատրաստվել է ռևանշի՝ օգտվելով իրավապահ մարմինների ղեկավարների ծածուկ օժանդակությունից, ապավինելով ՍԴ նախագահ Հրայր Թովմասյանի ու նրա թիմի աջակցությանը։ Փաշինյանը չակերտներ չբացեց, սակայն, ըստ էության, հասկացրեց կամ չհերքեց, որ Արթուր Վանեցյանը, Վալերի Օսիպյանը պաշտոնանկ են արվել հենց դավադրությանը մասնակից լինելու հետևանքով, ընդ որում՝ հայտնի սկեչի օրինակով հիմնավորելով, որ ԱԱԾ նախկին տնօրենն ասելիք չունի և, ըստ էության, ոչնչացնելով վերջինիս շուրջ հյուսված լեգենդը, որը կերտում են նախկին համակարգին հարող լրատվամիջոցները։
Նիկոլ Փաշինյանի ինքնավստահությունը հուշում է, որ ռևանշիզմը կամ հիբիդային հեղաշրջման փորձն իրապես ձախողված են, ընդ որում՝ նախ Արցախում կայանալիք նախագահական ու խորհրդարանական ընտրությունների համատեքստում։
Արդյո՞ք Նիկոլ Փաշինյանի ինքնավստահությունն ունի արմատներ, թե՞ վարչապետը փորձում է հասարակությանը հեռու պահել նախկինների քարոզչական ագրեսիայից, որի նպատակը խուճապի, անվստահության մթնոլորտի ստեղծումն է։ Նիկոլ Փաշինյանն ակնհայտորեն փակուղային իրավիճակ ստեղծեց հին համակարգի, վերջին շրջանում նրա հաղթաթուղթը դարձած Արթուր Վանեցյանի համար։ Ռևանշիզմի ցայտնոտային վիճակն ավելի ամբողջական դարձավ, երբ Փաշինյանն, ըստ էության, հասկացրեց, որ Հրայր Թովմասյանն աջակցություն չունի անգամ ՍԴ այսօրվա կազմում։
Այսպես իրեն կարող է պահել միայն ինքնավստահ, իրավիճակին ամբողջովին տիրապետող իշխանությունը, մյուս կողմից՝ բաց է մնում այն հարցը, թե ինչո՞ւ իրավական գնահատական չի տրվում ռևանշիստական ձգտումներին, մանավանդ, որ դրանց մասնակից են եղել նաև գեներալական ուսադիր ունեցող բարձրաստիճան պաշտոնյաներ, որոնք հեղափոխությունից հետո ստանձնել էին «Ռոբին Հուդի» կարգավիճակ։
Լուսանկարը՝ Photolure-ի