Թբիլիսիի գիշերային ակումբներից մեկի անվտանգության աշխատակիցները ծեծի են ենթարկել 25 հոգանոց հնդիկ զբոսաշրջիկների խմբին, քանի որ վերջիններս հրաժարվել են վճարել իրենց ներկայացված 40 հազար դոլարի չափով հաշիվը, հաղորդել է «Ռուսթավի 2» հեռուստաալիքը։
«Ֆիզիկական հաշվեհարդարի պատճառը հնդիկ զբոսաշրջիկներին ներկայացված հաշիվն է եղել։ Մինչ այդ նրանց գովազդային բուկլետներ էին բաժանվել, ըստ որոնց յուրաքանչյուր անձի համար մուտքավճարը 20 դոլար էր կազմելու՝ ներառյալ խմիչքները։ Արդյունքում ակումբի աշխատակիցները զբոսաշրջիկներին 40 հազար դոլարի չափով հաշիվ են ներկայացրել։ Հաճախորդները հրաժարվել են վճարել նշված գումարը, կռիվ է սկսվել, կռվի մասնակիցներից մեկին բժշկական օգնություն է ցուցաբերվել»,- հաղորդում է հեռուստաալիքը։
ԶԼՄ-ների տվյալներով, արդյունքում զբոսաշրջիկները 20 հազար լարի են վճարել (մոտ 7 հազար դոլար):
Զբոսաշրջային ընկերության ներկայացուցիչ Ելենա Գոդերձիշվիլին լրագրողներին հայտարարել է, որ Վրաստանում վերջին ժամանակներս հաճախ են նման դեպքեր տեղի ունենում, երբ հյուրերին ուռճացված հաշիվ է ներկայացվում։ Նրա խոսքերով, տվյալ դեպքերով պետք է զբաղվի ոստիկանությունը, քանի որ դա բացասաբար է անդրադառնում երկրի վարկանիշի վրա։
Վրաստանի ՆԳՆ-ը հետաքննություն է սկսել կատարված միջադեպի կապակցությամբ։