Լուրեր
Հայրենիքի պաշտպանությունից խոսում են մարդիկ, որոնք պատերազմի ժամանակ փախած էին. Գինոսյան

Ազգային ժողովն այսօր երկրորդ ընթերցմամբ և ամբողջությամբ ընդունեց քրեական ենթամշակույթ կրող խմբի և անձանց՝ «օրենքով գողերի» վերաբերյալ օրենքի նախագիծը: Այս օրենքի ընդունմանը նախորդեց խորհրդարանում թեժ միջադեպը՝ անկախ պատգամավոր Արման Բաբաջանյանի և ԲՀԿ խմբակցության պատգամավորների միջև: Հարց է ծագում, թե ինչու է հենց ԱԺ-ում բախում առաջացնում քրեական ենթամշակույթի դեմ պայքարը:

Թեմայի շուրջ «Առաջին լրատվական»-ի հետ զրույցում ազգագրական պարերի մասնագետ, հասարակական գործիչ Գագիկ Գինոսյանը նկատեց, որ Ազգային ժողովը հասարակության մանրանկարն է, և այնտեղ ամեն ինչ խտացված գույներով արտացոլվում է: «Կարծում եմ՝ ազգային խնդիրների բարձրացման հարց կա, որոնք ետին պլան են մղվում, իսկ նմանատիպ օրինագծերը պետք է երկրորդական պլանում լինեն, և ազգայինի գերակայության պարագայում դրանք ակամա կնահանջեն: Նաև դաստիարակչական-մշակութային լուրջ հիմնադրույթներ ձևավորելու դեպքում ժամանակի ընթացքում այդ ամենն ինքնաբերաբար կնահանջի»,- նշեց մեր զրուցակիցը:- Մենք օրենքով փորձում ենք կասեցնել մի բան, բայց մյուս կողմից մեծ ալիք ենք առաջացնում սերիալներով, նաև ԱԺ վարքուբարքով, պետական պաշտոնյաների խոսելաձևով: Եթե չենք դադարում այդ կիսագողական, ոչ հայեցի բառապաշարով խոսելը, մենք չենք կարող ձերբազատվել այդ ենթամշակույթից:

Երեսուն տարի պղծվել է հայ մշակույթը, հայ մանկան հոգին. հեուստատեսությունը և ԶԼՄ-ները կիսագողական, գողական բարքեր են սերմանում: Հնարավոր չէ մի կողմից պետականաքանդ, հակազգային ինչ ասես ցույց տալ, մյուս կողմից՝ այդպիսի օրենք ընդունել, այդ ամենը հեռուստատեսությամբ տեսնողը չի կարող միայն օրենք ընդունելով դառնալ ուրիշ: Նախ պետք է ճիշտ դաստիարակել… Ժամանակի ընթացքում զուգահեռաբար սաստող օրինագծի և ճիշտ դաստիարակության արդյունքում է միայն հնարավոր արդյունք ստանալ: Պետք է դաստիարակել քաղաքացի՝ ազգային ինքնությամբ և պետականության գիտակցումով»:

Խոսելով հայրենասիրությունից, հայրենատիրությունից և հայրենիքի պաշտպանության թեման շահարկողներից՝ Գագիկ Գինոսյանն ընդգծեց. «Այսօր հայրենիքի պաշտպանությունից խոսում են մարդիկ, որոնք պատերազմի ժամանակ փախել են երկրից: Նրանց պետք չէ լսել: Լսեք նրանց, ում խոսքից առավել գործն է եղել… Եթե ամբողջ կյանքում մարդը երկիրը թալանել է, հող է հանձել, փախել է, բայց այսօր հայրենիքից է խոսում, միևնույն է, «կարմիր կովը կաշին չի փոխում», թալանչին մնում է թալանչի, դասալիքը մնում է դասալիք… Աթոռի ձգտում են նրանք, ովքեր առանց այդ աթոռի ոչինչ են: Տեսնողը տեսնում է՝ թե ով է հայրենիքի մասին խոսելով՝ հայրենիք մատնում, ով է լռում, բայց հայրենիք պաշտպանում, և ով է շահարկում հայրենիքի անունը»:

Մանրամասն՝ տեսանյութում:

  • Դիտումներ՝ *