Կենտրոնամետ դեմոկրատների միջազգային միության (CDI) Գործադիր կոմիտեն, որի հերթական նիստը տեղի ունեցավ Յոջիակարտա քաղաքում (Ինդոնեզիա), ընդունել է բանաձև Հայաստանում քաղաքական իրավիճակի վերաբերյալ: Բանաձևում անդրադարձ է կատարվում Հայաստանում ժողովրդավարության խնդիրներին, մամուլի ազատությանը, դատական համակարգի քաղաքականացվածությանը և Սահմանադրական դատարանի նախագահ Հրայր Թովմասյանի հանդեպ իրականացվող «ճնշումներին»։ Բանաձևը հեղինակել և ներկայացրել է Հայաստանի Հանրապետական կուսակցությունը:
Այսպիսով՝ Կենտրոնամետ դեմոկրատների միջազգային միությունը (CDI) նախազգուշացնում է Հայաստանի կառավարությանը դեպի ավտորիտարիզմի ճանապարհ անցնելու մասին և ահազանգում, որ հանրային ճնշումը չարաշահելով՝ իշխող կուսակցության օգտին զսպումների և հակակշիռների համակարգը բացասականորեն փոխելը մեծ հետընթաց քայլ կլինի։ Կոչ է անում Հայաստանի իշխանություններին ամբողջովին հարգել դատական համակարգի անկախությունը և զերծ մնալ դատական որոշումների վրա ազդելուց և դրանք ցանկացած քաղաքական գործիքակազմի վերածելուց։ Լուրջ մտահոգություններ է հայտնում այն մասին, որ Հայաստանի դատական համակարգը դառնում է իշխանությունների ձեռքում քաղաքական հակառակորդների դեմ պատժի միջոց։ Նաև՝ իր մտահոգություններն է հայտնում ՍԴ նախագահ պարոն Թովմասյանի դեմ ճնշումների և հարուցված քրեական գործի կապակցությամբ:
Քաղաքագետ Ռուբեն Մեհրաբյանի կարծիքով՝ ցավալի է, որ նման փաստաթուղթ է ընդունվել. «Որովհետև այդ մտահոգություններն իրականության հետ որևէ կապ չունեն։ Ըստ ամենայնի՝ այդ փաստաթուղթն ընդունողները ընդհանրապես տեղյակ չեն Հայաստանում տեղի ունեցող գործընթացներից, իսկ եթե տեղյակ են, ապա միակողմանի»,- «Առաջին լրատվական»-ի հետ զրույցում ասաց նա։
Ըստ Մեհրաբյանի՝ սա նաև խոսում է մի կարևոր խնդրի մասին. «Պաշտոնական Երևանը, ցավոք սրտի, համապատասխան ջանքեր չի գործադրում Հանրապետական կուսակցության որոշ գործիչների ակտիվությունը չեզոքացնելու համար, դիվանագիտական ջանքերը պակասում են։ Մենք տեսնում ենք, որ նախկին համակարգի ներկայացուցիչների ջանքերը կարող են Եվրոպայում որոշ լոկալ հաջողություններ ունենալ։ Չնայած սա որևէ բան չի փոխում, այնուամենայնիվ մտածելու տեղ է տալիս։ Այդ մարդիկ սպասարկում են Հայաստանի նախկին, կոռուպցիոն համակարգը, պետությունը զավթած կազմակերպված քրեական խմբավորման շահերը և ժողովրդավարական հռետորաբանությունը, և բառամթերքն իրենց հետ ընդհանրապես կապ չունի։ Մենք չենք տեսնում մեր դիվանագիտության ջանքերը եվրոպական ուղղությամբ։ Իսկ արդյունքում ստանում ենք այն, ինչ ստանում ենք»։
Մեր զրուցակիցը նկատեց՝ սա ակնհայտ բացթողում է ՀՀ նոր իշխանությունների կողմից։ «Պաշտոնական Երևանն իրավունք չունի նման բաներին մատերի արանքով նայել։ Եվրոպական լսարանին պետք է ամբողջությամբ պարզ լինի, թե այդ ՀՀԿ-ի կողմից էմիսարները ինչ լոբբինգով են իրականում զբաղված։ Նման փաստաթղթերը ոչինչ չեն փոխում, իրականության հետ կապ չունեն, և հետո ո՞վ են այդ մարդիկ ընդհանրապես»,- եզրափակեց նա։
ՄԱՀՀԻ փորձագետ Արմեն Վարդանյանի կարծիքով՝ նշյալ կառույցին լուրջ վերաբերել պետք չէ, այն ազդեցիկ չէ։ «Բայց, միևնույն ժամանակ, իշխանությունները լավ կանեն, որ իրենց վարքագծին հետևեն ու չանեն այնպիսի քայլեր, որ կարողանա տարբեր կառույցներում Հայաստանի դեմ զեկույցներ ընդունվեն»,- «Առաջին լրատվական»-ի հետ զրույցում ասաց նա։
Վարդանյանը միևնույն ժամանակ հիշեցնում է՝ ՀՀԿ-ի ընդդիմությունն էլ ժամանակին տարբեր կառույցներում աշխատանք էր տանում, որ Հայաստանի դեմ զեկույցներ ընդունվեն, ու այժմյան ընդդիմադիր հանրապետականները գնում են այդ ճանապարհով. «Այդ պատճառով ես շատերի նման կոշտ հայտարարություն չէի անի ու չէի ասի, թե դա դավաճանություն է, ինչ-որ տեղ նորմալ է։ Բայց նաև իշխանությունը պետք է ուշադիր լինի, նման բանաձևերի տեղիք չտա»։
Մեր զրուցակիցը նաև շեշտեց՝ ՀՀ իշխող այժմյան ուժը նման կառույցներին անդամագրված չէ, իսկ ՀՀԿ-ի համար այդ առումով հեշտ է, ներսից կապեր ունեն ու կարողանում են աշխատանք տանել։