Եթե չես գիտակցում, թե 2018 թվականի ապրիլ-մայիս ամիսներին ինչ է տեղի ունեցել, գործընթացները չես հասկանա։ Այս մասին այսօր՝ հունվարի 24-ին, լրագրողների հետ զրույցում ասաց ԿԳՄՍ նախարար Արայիկ Հարությունյանը՝ արձագանքելով «Լուսավոր Հայաստան» խմբակցության պատգամավոր Անի Սամսոնյանին, որը բարձրացնում էր հանրակրթական դպրոցների կառավարման խորհրդներում ՔՊ-ականների ներգրավվածության հարցը։
«Նրանք մարդիկ են, որոնք նախկինում տարբեր ակտիվիստական գործունեություններում ներգրավված են եղել, գիտեն պրոբլեմները։ Հիմա եթե նայում ենք, տնօրենները չեն ընտրվում կուսակցական, այլ ընդհակառակը՝ այն մարդիկ, որոնք ավագանիում ակտիվ են, տարբեր ՀԿ-ների ներկայացուցիչներ են, նաև ԱԺ պատգամավորներ են դարձել, ժամանակին ակտիվ ներգրավված են եղել սոցիալական տարբեր շարժումների մեջ, կտեսնեք, որ նրանք իրավիճակ են փոխում, որովհետև հիմա հեղափոխությունից հետո դպրոցների՝ որպես քաղաքական գործընթացների մաս կազմելու գործառույթը դուրս է եկել իշխանության համար, խորհուրդները 2018 թվականին, ըստ էության, փլվեցին, հիմա դրա հավաքելու և դրանց վերաիմաստավորելու կարիք կա։ Այն անունները, որոնք հնչեցին, օրինակ՝ Սոֆյա Հովսեփյանն անընդհատ զբաղվել է ներառական կրթությամբ, հանրակրթության խնդիրներով և ըստ էության գիտի դպրոցը։ Հիմա ո՞րն է Սոֆյա Հովսեփյանի՝ խորհրդում ներգրավվելու վնասը»,-նշել է նա։