Ժնևում ընթացող ՄԱԿ-ի Մարդու իրավունքների խորհրդի Համընդհանուր պարբերական դիտարկման աշխատանքային խմբի 35-րդ նստաշրջանում քննարկվում է Հայաստանի 3-րդ պարբերական զեկույցը՝ Մարդու իրավունքների պաշտպանության բնագավառում Հայաստանի ձեռքբերումների և առկա խնդիրների վերաբերյալ:
Հայաստանի պատվիրակության ներկայացուցիչները խոսել են տարբեր բնագավառներում մարդու իրավունքների բարելավմանն ուղղված գործողությունների մասին:
ՀՀ Կենտրոնական ընտրական հաձնաժողովի նախագահ Տիգրան Մուկուչյանը խոսել է նոր Ընտրական օրենսգրքի, 2018-ին ՀՀ-ում տեղի ունեցած ընտրությունների ընթացքի և միջազգային կազմակերպությունների արձագանքի մասին:
«Ժողովրդավարական հաստատությունների և մարդու իրավունքների գրասենյակի՝ ընտրությունների դիտորդական առաքելության վերջնական զեկույցում նշվել է, որ ընտրություններն անցկացվել են բնակչության մեծ մասի վստահության պայմաններում և համապատասխանել են մարդու հիմնական իրավունքներին: ՄԱԿ-ի զարգացման ծրագրի վիճակագրության համաձայն ՝ հարցվածների 74 տոկոսը լիովին կամ մասնակիորեն համաձայնել է, որ խորհրդարանական ընտրությունների ժամանակ ԿԸՀ-ն գործել է պրոֆեսիոնալ և թափանցիկ: Հարկ է նշել, որ անկախ Հայաստանի պատմության մեջ առաջին անգամ է, որ խորհրդարանական ընտրությունների արդյունքները ճանաչվել են գործընթացի բոլոր մասնակիցների կողմից: Հանրային վստահության բարձր մակարդակը ընտրական գործընթացը գնահատելու լավագույն ցուցիչն է»,- ասել է Տիգրան Մուկուչյանը:
Հայաստանի պատվիրակության զեկույցներից հետո նիստին ներկա տարբեր երկրների ներկայացուցիչներից յուրաքանչյուրն իր դիտարկումներն է արել՝ նշելով, թե որ ոլորտներում Հայաստանը աշխատանք ունի անելու: Երկրների մեծ մասի ներկայացուցիչները նկատել են տարբեր ոլորտներում Հայաստանի գրանցած դրական առաջընթացը և հիմնականում խորհուրդ են տվել մեծ ուշադրություն դարձնել կանանց իրավունքներին, ընտանեկան բռնությանը, կանանց դեմ բռնությանը, թրաֆիքինգին, գենդերային հավասարությանը, հաշմանդամություն ունեցող մարդկանց հասարակություն ինտեգրելուն, աղքատության դեմ պայքարին, կոռուպցիայի դեմ պայքարին, դատական համակարգի բարեփոխումներին և մի շարք այլ ոլորտների: