«Հայաստանի եվրոպացի բարեկամներ» կազմակերպությունը, նպատակ ունենալով բացահայտել, թե ինչպես է ընկալվում միջազգային հանրությունը Հայաստանում, անցկացրել է սոցիոլոգիական հետազոտություն: Հետազոտությունը ներառում է հարցեր Հայաստանի ներքին իրավիճակի, Թուրքիայի, Լեռնային Ղարաբաղի, Եվրամիության, ԵԱՀԿ-ի և Հայաստանի հետ առնչություն ունեցող այլ միջազգային կառույցների մասին: Հետազոտության աշխատանքներն , ըստ կազմակերպության ներկայացուցիչների, իրականացվել են 2010 թ-ի հոկտեմբերի 15-18-ը դեմ առ դեմ կատարված 1208 հարցազրույցների միջոցով Հայաստանի բոլոր մարզերում և Երևանում: «Հայաստանի եվրոպացի բարեկամներ» կազմակերպությունը, որի հայաստանյան գործընկերն է «Այ Փի Էս Սի» քաղաքական և սոցիոլոգիական խորհրդատվությունների ինստիտուտը, հետազոտությամբ պարզել է, որ հայաստանցիների ուղիղ կեսը կարծում է, որ երկրի զարգացումն ընթանում է ճիշտ ուղղությամբ, և միայն մեկ երրորդն է այն կարծիքին, որ այն ընթանում է սխալ ուղղությամբ: Որպես անկախ սոցիոլոգիական կազմակերպություն ներկայացող «Հայաստանի եվրոպացի բարեկամները», համեմատելով Հայաստանում անցկացված հարցումները բազմաթիվ այլ երկրների հետ, եկել է հետաքրքիր եզրակացության` համարելով դա դրական արդյունք: Պարզվում է` ԱՄՆ-ում, օրինակ, հարցվողների մեկ երրորդից էլ քիչ մասն է այն կարծիքին, որ երկրի զարգացումն ընթանում է ճիշտ ուղղությամբ, իսկ Մեծ Բրիտանիայում` 40 տոկոսից էլ պակասը: Պարզվում է նաև, որ հայաստանցիների մեկ քառորդը կարծում է, որ երկրի իշխանությունն ընդհանրապես չի ներկայացնում իրենց շահերը, իսկ 59 տոկոսը կարծում է, որ այն միայն որոշ չափով է ներկայացնում դրանք: Ըստ «Հայաստանի եվրոպացի բարեկամներ» կազմակերպության հարցումների` գործազրկությունը ՀՀ բնակչությանն ամենաշատ հուզող խնդիրն է, իսկ գլոբալ ֆինանսական ճգնաժամի պայմաններում տնտեսության մեջ քիչ առաջընթաց է արձանագրվել:
