Հայաստանի արտաքին գործերի նախարարության խոսնակը անդրադառնալով Բաքվի հայկական ջարդերի 30-րդ տարելիցի հայկական հիշատակումներին ի պատասխան Ադրբեջանի նյարդային արձագանքի վերաբերյալ հարցին, խոսել է 30 տարի առաջ տեղի ունեցած վայրագությունների, դրանց առնչութամբ Բաքվի ներկայիս դիրքորոշումների մասին և այդ համատեքստում արել հույժ կարևոր արձանագրում:
Հայաստանի ԱԳՆ խոսնակը ազդարարել է, որ այդ ամենը վկայում է հայ ժողովրդի որևէ հատվածի անվտանգության որևէ հատված Ադրբեջանի իշխանությանը թողնելու անթույլատրելիության ու անհնարինության մասին: Նա միաժամանակ հայտարարել է, որ դա ևս մեկ անգամ վկայում է՝ Արցախը չի կարող լինել Ադրբեջանի կազմում որևէ պարագայում, և Արցախի ժողովուրդը չի կարող մնալ առանց անվտանգության համար անհրաժեշտ գծերի: Երևանից հնչող հայտարարությունը կարևոր է անշուշտ ոչ միայն, և թերևս ոչ այնքան Արցախի հարցի առնչությամբ ներքին շահարկումների կանխարգելման և արգելակման իմաստով, որոնք ծավալվում են քարոզչական դաշտում Հայաստանի նոր իշխանության դեմ:
Մեծ հաշվով, այդ արշավի արհեստական և մանիպուլյացիոն բնույթը ակնառու է վաղուց: Երևանի հայտարարությունն էական է ներկայիս աշխարհաքաղաքական իրողությունների և ռեգիոնալ անվտանգության միջավայրում տեղի ունեցող էական փոփոխությունների գործընթացի ֆոնին, որոնց աշխույժ ալիքով սկսվել է 2020 թվականը Բաղդադում տեղի ունեցած հայտնի իրադարձություններից հետո:
Միաժամանակ, նաև Ադրբեջանում մեկնարկած խորհրդարանի ընտրության գործընթացի, նախընտրական արշավի համատեքստում Արցախի հարցում և հայկական հաղթանակով ձևավորված անվտանգության միջավայրի առնչությամբ Հայաստանի դիրքորոշումների և պատասխանատվության հստակեցումն ու հավաստիացումը ստանում է կարևոր նշանակություն:
Լինելով ռեգիոնալ անվտանգության համակարգի առանցքը, Արցախի հարցը միաժամանակ թիկունքային էական նշանակություն ունի եվրասիա-մերձավորարևելյան տիրույթում գտնվող կոնֆլիկտային մի շարք գոտիների հետ հարաբերակցության իմաստով: Իսկ հաշվի առնելով այն, որ այդ գոտիներում խաչվում են ուժային ռեգիոնալ և համաշխարհային կենտրոնների բազմաբնույթ շահեր, Երևանի պատասխանատվությունը և այդ առնչությամբ հավաստիացումը ստանում է էական նշանակություն՝ որևէ կենտրոնի համար թիկունքում անակնկալի բացառման իմաստով, ինչը Հայաստանի և Արցախի անվտանգության համար ունի կարևոր նշանակություն այլ հարցերում այդ կենտրոնների հետ աշխատանքի համար, հաշվի առնելով նրանց իրարամերժ դիրքորոշումներն ու սառը կամ երբեմն նույնիսկ տաք դիմակայության հանգամանքները:
