Թուրքիայի նախկին վարչապետ ու արտգործնախարար, «Ապագա» կուսակցության ղեկավար Ահմեթ Դավութօղլուն խոսել է Թուրքիայի նախագահ Ռեջեփ Թայիփ Էրդողանին ուղարկած ԱՄՆ նախագահ Դոնալդ Թրամփի հայտնի նամակի մասին:
Անդրադառնալով նամակի բովանդակությանը, որում Թրամփը Էրդողանին հորդորում է «հիմար չլինել»՝ Դավութօղլուն հայտարարել է, որ եթե արտգործնախարարը իր վարչապետության ժամանակ իրեն փոխանցեր այդ նամակը, ապա ինքը պաշտոնանկ կաներ տվյալ նախարարին:
«Իմ արտգործնախարարության շրջանում ես պաշտոնանկ կանեի մեր դեսպանին, ինձ այդպիսի նամակ բերելու համար: Իմ վարչապետության ժամանակ պաշտոնանկ կանեի նաև արտգործնախարարին, եթե նա այդպիսի նամակ հանձներ ինձ»,- ասել է Դավութօղլուն:
Դավութօղլուն նաև նշել է, որ իր՝ արտգործնախարարի պաշտոնում լինելու ժամանակ ևս ԱՄՆ-ի հետ հարաբերություններում լարվածություն եղել է, բայց «Թուրքիան երբևէ չէր ստացել այնպիսի խայտառակ նամակ, ինչպիսին Թրամփի ուղարկած նամակն էր»: