Ազգային ժողովն այսօր երկրորդ ընթերցմամբ և ամբողջությամբ ընդունեց քրեական ենթամշակույթ կրող խմբի և անձանց վերաբերյալ օրենքի նախագիծը: Նախագծին կողմ է քվեարկել իշխող խմբակցությունը։ «Հայաստանի Հանրապետության քրեական օրենսգրքում փոփոխություններ և լրացումներ կատարելու մասին» և «Հայաստանի Հանրապետության քրեական դատավարության օրենսգրքում լրացում կատարելու մասին» օրենքների նախագծերի փաթեթն ընդունվեց 73 կողմ, 20 դեմ և 15 ձեռնպահ ձայներով:
Այս օրենքի ընդունմանը նախորդեց խորհրդարանում թեժ միջադեպը, որն ուշագրավ է նաև նրանով, որ բացահայտում է խորհրդարանի և Հայաստանում առկա ներքաղաքական իրողությունների բավականին զգայուն անհամապատասխանությունը:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Անուշ Բեղլոյանը, վերլուծաբաններ Գոռ Մադոյանը և Մհեր Ղալեչյանը:
Անդրադառնալով դիտարկմանը, որ այնքան էլ հասկանալի չէ, թե ինչու են որոշ պատգամավորներ ձեռնպահ քվեարկել օրինագծին, Անուշ Ղալեչյանը նկատեց, որ ընդդիմադիր գործընկերները փորձել են «և՛ նալին խփել, և՛ մեխին»՝ տվյալ օրենքի ընդունմանն իրենց անհամաձայնությունը փաթեթավորելով թվացյալ իրավական փաստարկներով:
Անդրադառնալով ԱԺ-ում օրենքի ընդունմանը նախորդած թեժ միջադեպին՝ Գոռ Մադոյանը կարծիք հայտնեց, որ այդ թոհուբոհի մեջ մի քանի շերտեր կային. «Ուժը, որ բորբոքվել էր և պաշտպանում էր այդ օրենքի արդյունքում տուժողների իրավունքները, ենթադրվում է, որ մտավախություն ուներ, որ իր ընտրազանգվածի հետ խնդիրներ պետք է առաջանան այդ օրենքի ընդունման հետևանքով: Այդ ուժն անընդհատ փնտրտուքների մեջ է, օդիոզ պատգամավորներ կան, որ անընդհատ փորձում են Հռոմի պապից ավելի կաթոլիկ երևալ…»: Վերլուծաբանի խոսքով՝ գործող իշխանությունները քրեական ենթամշակույթը կրողների և նրանց ծառայություններն իրենցով անելու կարիքը չունեն:
ԱԺ-ում բախումները նաև քաղաքական են: Քննարկման մասնակիցների դիտարկմամբ՝ ԲՀԿ-ի համար քրեական ենթամշակույթը արժեք է:
Մտավախություն կա, որ այս օրենքը կարող է մնալ թղթի վրա: Մհեր Ղալեչյանի դիտարկմամբ՝ պայքարելով քրեական ենթամշակույթի դեմ՝ պետք է համալիր միջոցառումներ իրականացվեն, և օրենքի ընդունումը կարող է ընդամենը դեկլարատիվ բնույթ կրել, եթե զուգահեռաբար այդ բոլոր միջոցառումները չիրականացվեն: «Նախևառաջ պետք է քրեկան ենթամշակույթը ծնող միջավայրը արմատախիլ արվի, դա պետք է սկսել մանկապարտեզից ու դպրոցից… Քրեական բարքերը տիրաժավորող սերիալներ են ցուցադրվում, որտեղ առաջին պլանում «լավ տղաներն» են, «լավ տղուց» հերոս են կերտում, և բնականաբար դրանք են կերպար դառնում երիտասարդ սերունդների համար… Իսպառ պետք է վերացվի «բլատնոյը» գովերգելու կամ դա արժևորելու մշակույթը»:
«Քրեական մշակույթի առկայությունը անհամատեղելի է պետության և օրինականության հետ»,- ընդգծեց Անուշ Բեղլոյանը՝ հավելելով, որ դա արդեն անտանելի ծավալներ էր գրավել:
Մանրամասն՝ տեսանյութում:
