Լուրեր
Կուտոյանի մահով պետությանը բաց պատերազմ հայտարարվեց․ Հովհաննես Գալստյան

«Երբ ԱԱԾ նախկին ղեկավարը ավարտում է իր կյանքը սպանությամբ կամ ինքնասպանությամբ, դու զգում ես քո, քո երկրի անպաշտպանվածության սարսափելի աստիճանը»,- այս մասին «Առաջին լրատվական»-ի հետ զրույցում, անդրադառնալով Գեորգի Կուտոյանի մահվանը, ասաց ռեժիսոր Հովհաննես Գալստյանը՝ հավելելով, որ նման դեպքերի վերաբերյալ սպառիչ պատասխան ստանալու նախադեպեր չկան, այդ իսկ պատճառով քիչ է հանրության վստահությունը, որ այս դեպքը ամբողջությամբ կբացահայտվի:

Ռեժիսորի դիտարկմամբ՝ նախկին իշխանությունը շատ ավելի արագ արձագանքեց Գեորգի Կուտոյանի մահվան բոթին, քան գործող իշխանությունը. «Գործող իշխանությունը կարծեք թե մեզ՝ քաղաքացիներիս նման շոկի մեջ էր: Բայց պետք է նրանք շատ արագ արձագանքեին, մենք Հոկտեմբերի 27 ենք տեսել, մեր ԱԱԾ-ն ամեն ինչի պատշաճ արձագանքին պետք է պատրաստ լինի»:

Արդյո՞ք Գեորգի Կուտոյանի մահը յուրօրինակ ուղերձ չէ ՀՀ հասարակությանը, որպեսզի վախի, խուճապի մթնոլորտ ստեղծվի, որովհետև այն բացահայտումները, որ տեղի են ունենում ձեռնտու չեն որոշ մարդկանց և չեն բխում որոշ կլանների շահերից: «Թիրախը, ցավոք, ընտրել են Գեորգի Կուտոյանին, բայց սա իհարկե կրակոց էր նաև Հայաստանի հասարակության վրա և նպատակը վախի մթնոլորտ առաջացնելն է»,- ընդգծեց Հովհաննես Գալստյանը՝ հավելելով՝ մենք խոցելի ենք՝ որպես երկիր, որպես երկրի քաղաքացի և կախված ենք արտաքին ազդակներից: «Մենք պետք է էլ ավելի ագրեսիվ դառնանք մեր ինքնությունը պահպանելու համար և պետք է գնանք ազգային պետություն կառուցելու ճանապարհով…»,- նշեց մեր զրուցակիցը:

Մանրամասն տեսանյութում:

  • Դիտումներ՝ *