Անցած շաբաթ Պարույր Սևակի փողոցի իր բնակարանում հայտնաբերվեց ԱԱԾ նախկին պետ Գեորգի Կուտոյանի դին։ Քննչական կոմիտեի կողմից անցկացված քննության արդյունքում ինքնասպանության հասցնելու հոդվածով քրեական գործ է հարուցվել։
Հանրությունն ինքնասպանության վարկածին մեծ վերապահումով մոտեցավ, որովհետև Գեորգի Կուտոյանը հասարակ չինովնիկ չէր, այլ Ազգային անվտանգության ծառայության ղեկավարն էր, որը լուրջ մասշտաբների, մեծ քանակությամբ գաղտնի տեղեկատվության է տիրապետել։ Նրա մահվան ու նախկին ոստիկանապետ Հայկ Հարությունյանի՝ նման հանգամանքներում ինքնասպանության դեպքի միջև կապ տեսնո՞ւմ եք, թե՞ ոչ․ «Առաջին լրատվական»-ի հարցին ԱԺ երկրորդ գումարման պատգամավոր, ՌԴ կառավարությունում 2000-2003 թթ. Հայաստանի կառավարության հատուկ ներկայացուցիչ Տարոն Սահակյանը պատասխանեց․ «Նախ՝ ես ուզում եմ ցավակցել Գեորգի Կուտոյանի ընտանիքին, հարազատներին։ Անձամբ չեմ ճանաչել, բայց երևույթն ինքնին շատ ցավալի է։
Հեղափոխությունից հետո ես իմ հարցազրույցներից մեկի ժամանակ խոսել եմ առեղծվածային ևս մեկ մահվան հետ կապված։ Եթե հիշում եք՝ վարչապետ Նիկոլ Փաշինյանը հանդիպեց ՌԴ նախագահ Վլադիմիր Պուտինի հետ, և հստակ պայմանավորվեցին գազի գնի հետ կապված գործողությունների հետ։ Ռուսական կողմը հայտարարեց, որ սահմանի վրա գազի գինը սահմանվել է 150 դոլար։ Դրանից հետո վարչապետին կից ստեղծվեց հանձնաժողով, որը պետք է ուսումնասիրություններ կատարեր, և այդ արդյունքներից ելնելով՝ պետք է գային գազի գնի վերջնական համաձայնության։ Այդ ժամանակ առեղծվածային մահով մահացավ շատ կարևոր մի անձ՝ Նիկոլայ Գաբրիելյանը, որը հայտնի էր Գազի Կոլյա անվամբ։ Այդ ժամանակ ԱԱԾ տնօրենը Արթուր Վանեցյանն էր, և չեմ կարծում, որ նա այդ տեղեկություններին չի տիրապետում։ Որքան գիտեմ՝ Վանեցյանին պաշտոնից ազատելուն հետևեց Հայկ Հարությունյանի ինքնասպանությունը, և որքան գիտեմ՝ մի քանի օր առաջ Վանեցյանը հայտարարեց, որ իր անվտանգությանը սպառնալիք կա և ուժեղացրեց իր անվտանգությունը, որին հաջորդեց Գևորգ Կուտոյանի առեղծվածային մահը։
Ես համաձայն չեմ ո՛չ իշխանական թևի որոշ հայտարարություններին, որ սա անցյալի արձագանք է, ո՛չ էլ նախկին իշխանավորների կողմից հնչեցրած կարծիքներին, թե սա մթնոլորտը սևի ու սպիտակի բաժանելու հետևանք է։ Երկու դիրքորոշումներն էլ պրիմիտիվ են»։
Մանրամասները՝ տեսանյութում։
