Այսօր՝ հունվարի 21-ին, Ազգային ժողովում շարունակվում է հերթական նիստի աշխատանքը: Շարունակում է քննարկվել Իրավաբանական անձանց գրանցման մասին օրենքի նախագիծը:
«Պետք է ի վերջո հասկանանք՝ ում ենք համարում լրատվամիջոց, և այն ամենաթողությունը, որ մենք այսօր թույլ ենք տվել համացանցում, ուղղակի այլևս չի կարող շարունակվել. ազատությունը, իրավունքը ենթադրում է պատասխանատվություն»,- իր ելույթում հայտարարեց պատգամավոր Արման Բաբաջանյանը:
Նրա խոսքով՝ լրատվական դաշտում տեղեկատվական պատերազմ է և գրոհ պետության, պետականության հիմնասյուների դեմ. «Հակառակորդները, պետության ներքին թշնամիները վախենում են այն բանից, որ մենք վախենում ենք իրերն իրենց անուններով կոչել: Եվ ես կարծում եմ՝ այստեղ ավելի հատու միջոցներ են պետք՝ լուծելու այս քաոտիկ իրավիճակը»:
Պատգամավորի կարծիքով՝ լրատվամիջոցների իրական սեփականատերերի բացահայտումը չի լուծի այս խնդիրը. «Մենք քաղաքական դիրքորոշում չունեցող քաղաքացուն անպաշտպան ենք թողնում այս գրոհների տարափի տակ, իսկ քաղաքացուն պաշտպանելը պետության ուղղակի պարտականությունն է»:
Արման Բաբաջանյանը նշեց, որ այդ ԶԼՄ-ները օգտվում են օրենքների անկատարությունից. «Ամերիկյան, ռուսական դոմեյններից օգտվում են շատ շատերը, և բացառված չէ, որ արտաքին ֆորս-մաժորների դեպքում այդ նույն դոմեյնները սկսեն գործել հօգուտ մեր թշնամիների»:
Մանրամասները՝ տեսանյութում: