Թուրքիայի վճռաբեկ դատարանը 2019 թվականին Ստամբուլում գտնվող հայկական «Սանասարյան հանի» (Սանասարյան տան) սեփականության իրավունքը պետությանը հանձնելու որոշում էր կայացրել, որի համաձայն՝ շենքը պատկանելու էր Թուրքիայի հիմնադրամների գլխավոր վարչությանը:
Սակայն ըստ թուրքական մամուլում շրջանառվող լուրերի՝ պատմական շինությունը շուտով 5 աստղանի հյուրանոց է դառնալու: Մի կազմակերպություն այն 35 տարով շահագործելու իրավունք է ստացել:
Հիշեցնենք, որ «Սանասարյանի հանը» կառուցվել է Ստամբուլում 1881թ. էրզրումցի բարերար Մկրտիչ Սանսարյանի կողմից՝ Էրզրումում բացված նույնանուն դպրոցի համար եկամուտ ապահովելու նպատակով: 1930-ականներին շենքի բռնազավթումից հետո այն դարձել է Ստամբուլի ոստիկանության շենք, այնուհետև այստեղ է կենտրոնացել տնտեսական դատարանը:
Ի դեպ, 2018 թվականին Պոլսո Հայոց պատրիարքարանը շենքը հայ համայնքին վերադարձնելու նպատակով դիմել էր վճռաբեկ դատարան և շահել դատական գործը: Սակայն Հիմնադրամների գլխավոր վարչության պահանջով դատական որոշումը բեկանվել էր: