Լուրեր
Կուտոյանը աշխատել է հանցավոր համակարգում. մահվան պատճառը հետևանք է իր նախկին գործունեության

Այսօր Երևանում վերջին հրաժեշտը տվեցին ԱԱԾ նախկին ղեկավար Գեորգի Կուտոյանին։ Կառավարությունն իր լիազորությունների շրջանակում ամեն ինչ կանի Գեորգի Կուտոյանի մահվան հանգամանքները լիարժեք բացահայտելու համար․ երեկ նման հաղորդագրություն է տարածել երկրի ղեկավարի գրասենյակը։ Նույնն է խոստացել ԱԱԾ պետի ժամանակավոր պաշտոնակատարը` ցավակցական տեքստում խոսելով այն մասին, որ մահվան առիթով քրգործը վարող մարմինը, ինչպես նաեւ մյուս իրավապահները՝ այդ թվում ԱԱԾ-ն, կանեն ամեն ինչ Գեորգի Կուտոյանի մահվանն առնչվող բազմաթիվ հարցերի սպառիչ պատասխաններ տալու համար: Հասկանալի է, գործող իշխանության պատվի խնդիրն է այս առեղծվածային մահվան հանգամանքները պարզաբանելը։ Մինչ այդ դեպքի առնչությամբ հնչում են ամենատարբեր գնահատականներ, կառուցվում է անգամ «շղթայի» գաղափարը` հղում անելով նաև ամիսներ առաջ նախկին ոստիկանապետ Հայկ Հարությունյանի ինքնասպանության կամ սպանության հանգամանքին:

«Առաջին լրատվական»-ի հետ թեմայի շուրջ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, փիլիսոփա, կրոնագետ Վարդան Խաչատրյանը և «Իմ քայլը» խմբակցության պատգամավոր Հովիկ Աղազարյանը:

«Կարծում եմ՝ Հայկ Հարությունյանի և Գեորգի Կուտոյանի մավան հանգամանքները ամբողջությամբ կբացահայտվեն»,- նշեց Ազատ Արշակյանը՝ հավելելով, որ արդեն ուրիշ մոտեցում պետք է լինի, ամեն ինչ պետք է անել, որ գաղտնիքների տիրապետող պաշտոնաթող անձանց անվտանգությունն ապահովվի:

«Գեորգի Կուտոյանը աշխատել է ոչ լեգիտիմ, հանցավոր համակարգում, և նրա մահվան պատճառը հետևանք է իր նախկին գործունեության»,- ընդգծեց Հովիկ Աղազարյանը՝ հավելելով, որ այդ համակարգում աշխատելով՝ Կուտոյանը, թեկուզ ինֆորմացիոն մակարդակում, չէր կարող հեռու լինել այն երևույթներից, որոնք տեղի են ունեցել մեր հայրենիքում:

«Մենք ապրում ենք հատուկ ծառայությունների քաղաքակրթության ժամանակներում, և երկրների զգալի մասում անհատների գործունեությունը շատ բաներով պայմանավորված է այդ անձանցով,- նշեց փիլիսոփա, կրոնագետ Վարդան Խաչատրյանը: -Պետք է հասկանալ. եթե անգամ դա ծայրահեղ ակտ էր՝ եթե Կուտոյանն իսկապես ինքնասպանություն է գործել, ապա ի՞նչ է նախորդել դրան, ինչպիսի՞ հոգեվիճակում է եղել անձը… Պետք էր լռություն պահպանել, ինչը հարգանքի տուրք կլիներ…»:

 

Մանրամասն՝ տեսանյութում:

  • Դիտումներ՝ *