Իսպանիայում առնվազն երեք մարդ է զոհվել անբարենպաստ եղանակի պատճառով, որն ուղեկցվում է քամու ուժգին պոռթկումներով և ձյան տեղումներով: Այդ մասին հունվարի 20-ին հայտնել Է 20minutos թերթը։
Հրատարակության տեղեկատվության համաձայն՝ կիրակի օրը մի տղամարդ է մահացել Աստուրիա ինքնավար հանրակցությունում: Բացի այդ, երկուշաբթի օրը հայտնի է դարձել Գանդիայում (Վալենսիայի ինքնավար հանրակցություն) անօթևան մի կնոջ մահվան մասին:
Եվս մեկ տղամարդ զոհվել է Պեդրո-Բեռնարդո բնակավայրում (Կաստիլիա-ի-Լեոնի ինքնավար հանրակցություն):
Իսպանիայի պետական օդերևութաբանական գործակալությունը փոթորկի պատճառով նախազգուշական հայտարարություն է արել թագավորության 33 նահանգում: Եղանակային պայմանների պատճառով փակվել են մի քանի ճանապարհներ, ինչպես նաև Վալենսիայի և Գանդիայի նավահանգիստները:
Թերթի տվյալներով՝ Վալենսիայի 194 մունիցիպալիտետներում չեղարկված են պարապմունքները: Իսպանիայի օդանավակայանների վարչությունը Twitter-ում հայտնել է, որ Ալիկանտեի օդանավակայանն օրվա ընթացքում փակ կլինի անվտանգության նկատառումներով: Ըստ օդերևութաբանների կանխատեսումների՝ եղանակային բարդ պայմանները կպահպանվեն նաև հունվարի 21-ին։