Ս․թ․ հունվարի 24-ին տեղի կունենա «Բ․Մ․Լ․ Արզնի ընկերությունն ընդդեմ «Անելիք բանկի»» գործով վերաքննիչ դատարանի նիստը։ Այդ առիթով Բանկի Վարչության նախագահ Մհեր Աբրահամյանն անդրադարձել է իրենց սպասելիքներին Վերաքննիչ դատարանից՝ հաշվի առնելով, որ տվյալ գործով եղել են դատական ակտեր թե Բանկի օգտին, թե Բանկի դեմ։
Իրոք, այս գործով սպասում ենք արդեն ըստ էության գործը լուծող թվով չորրորդ դատական ակտին․ Կոտայքի մարզի առաջին ատյանի և Երևանի ընդհանուր իրավասության դատարանները վճռել են բռնագանձել Բանկից մոտ 22 մլն ԱՄՆ դոլարին համարժեք գումար, սակայն Բանկը երկու դեպքում էլ վերաքննիչ բողոք է ներկայացրել։ Առաջին դեպքում այն բավարարվել էր, հիմա սպասում ենք Վերաքննիչի երկրորդ որոշմանը։
Հույս ունենք, որ Վերաքննիչ դատարանը՝ դատավոր Հարություն Ենոքյանի նախագահությամբ, ամբողջությամբ կքննի գործի բոլոր հանգամանքները և կկայացնի անաչառ որոշում՝ չեզոքացնելով բանկային ողջ համակարգի դեմ առկա սպառնալիքը։ Հիշեցնեմ՝ խոսքը «Արզնի» հանքային ջրերի գործարանի շուրջ ծագած վեճի մասին է, երբ իրական շահառուն իրեն պատկանող մի ընկերության վարկի համար գրավ դնելով գործարանը և չկատարելով պարտավորությունները՝ ժամանակ անց Բանկի հետ համաձայնագրի արդյունքում հետ է ստացել գույքի 33%-ը (գույքը բռնագանձվել էր պարտքի դիմաց), և այժմ պահանջում է Բանկից տույժ վճարել գույքի հնգապատիկի չափով՝ որպես հիմք վկայակոչելով 2015թ-ին ստորագրված համաձայնագրով սահմանված նախապատվության իրավունքի խախտումը։ Ի դեպ, բուն համաձայնագիրը ևս հանդիսանում է դատական վեճի առարկա․ մեր կողմից ներկայացված հայցը, մասնավորապես, կասկածի տակ է առնում վերջինիս իրավական ուժ ունենալը։ Այսքանը իր բնույթով և ծավալով աննախադեպ այս գործընթացի իրավական կողմի մասին։
Մեր իրավաբանական խումբը մանրամասն ուսումնասիրել է գործը, և արդյունքում մասնագետները հիմնավոր կասկածներ ունեն առ այն, որ գործում առկա է նաև քրեական բաղադրիչ։ Այժմ սպասում ենք փորձագիտական եզրակացության, որը ստանալուց հետո չենք բացառում, որ կդիմենք պատկան մարմիններին՝ հանցագործության մասին հաղորդումով։
Ասեմ, որ անկախ ամեն ինչից Բանկը պատրաստ է զարգացումների ցանկացած սցենարի, այնուամենայնիվ լիահույս ենք, որ Վերաքննիչ դատարանը կկայացնի արդար որոշում և առողջ բանականությունն այս գործում ի վերջո կհաղթի։